ماتفوت طبـــك

حافوت الطب ورايا
و ألبس عمة و عبايه
و أعمل دقن شبرين
و حابرم الشنبين
و أسمي نفسي سيدنا
و أقول اني مخاوي
حاجة احتراف عفاريت
مش زي الباقي .. هاوي
و أجيب حلة قديمة
و حبة زعفران
و أقول بخيمة لئيمة
على أشتاتا أشتوت
يليها كام شتيمة
أطلع يا أمشخوت
يا مارد يا أبو سيفين
بتقول جنودك مالهم
ليه بس زعلانين؟
اه، عايزين فطارهم
فخدة نملة هندي
عبرت المحيط
و شعرة من بطن ايد
عيل يكون عبيط
و كيلو لحمة ضاني
تكون من ديل خروف
امه نعجة سوداني
و بتعرف تقرا الحروف
و أبوه يكون تور
قرنه اتكسر في الحرب
أصله بلاد اشور
و صاحبه هراه ضرب
و عرف ديك من الصين
معاه باسبور ايطالي
مولود بقاله يومين
و يكون على صاحبه غالي
-و منين أجيبهم يا سيدنا؟
-تلاقي لو تدور
-طب أرجوك ساعدنا
-ممكن سندوح يقدر
-و مين سندوح يا شيخنا؟
-ده عفريت من المطاريد
فاتح كام شركة بريد
الطلب الناقص يجيبه
أما بياخد نصيبه
-طب شوفه يحتاج كام؟
-خمسينه بالتماام
يدفع صاحبنا أوام
أرمي حبة بخور
و أقول هجام جخام
و الطبق يلف يدور
أمد ايدي ف كيس
و أجيب عمل صغير
و أقول مبارك
حاجتتك أنقضت*
ارجع تجد مراتك
و كل الشرور مضت
و ادي كام تلاف جنيه
من غير شقا و علام
و الشهرة ايه يا عالم
مطلوبٌ في الأفلام
ماتفوت طبك يا صاحبي
و افتحلك حتى مقلى
بكرة عربية كبده
تبقى م الطب أبقى

* تقرأ بالفصحى