ملحوظة هامة و بيان خطير و اعتراف قنبلة

لأن السادة الزوار شكلهم بيهيسوا هم كمان، و احتمال ينافسونا، ولأن الأمور اتلخبطت و تداخلت عندهم، كان لازم أقول الملاحظة دي
البلوج دي يا سادة فيها خمسة في عين العدو بيكتبوا .. أصل في ناس فاكرانا كلنا شخص واحد، و مش واخدين بالهم من الحكاية دي لذا لزم التنويه
أولا عندك الدائخ - دا اللي هو أنا - و هو صاحب البلوج .. بشكل عام شخصية رخمة و دمها تقيل و شغله كله في المضروب، و أستاذ في التناحة .. أي و الله .. لو حد شافه يبقي يبلغه سلامي و إني مش عايز أشوفه تاني
بعدين عندك المهيس الأكبر .. و دا شخصية حتفكرك علي طول بالبراغيت .. طفيلي .. لزقة موت بس مهيس كبييييير .. و نسكت علشان الطيب أحسن
ثم الكائن المتبقلظ سكوبل، و ده شخصية دمها خفيف و لا يعيبه سوي نباهة ولي عهدها ببركات كليتنا الحبيبة حفظها الله .. و زي ما بيقول عن نفسه: "تلات حاجات ما افرطش فيهم .. النوم و اللعب و الأكل .."
عمك المجنون بقي ده لا يوصف بأكتر من أنه الأنتوخ المتأنتخ .. ضاربها طبنجة و لا كأنها دنيته .. و جته نيله ف حظه الاسم سعيد !
مين تاني ؟ .. كركرينا .. مش باينه له حاجه، اكمنه ما عندوش إسهال تهييسي زينا .. و أخيرًا عمك جدع حتي الثمالة .. ده أنا كنت ناوي أعدمه بس لقيت في ناس بتقرا له، قلت بلاش .. هو أينعم مابيهيسش، بس ما أقدرش أعدمه ضد رغبة الجماهير .. براءة المرة دي
دي كانت الملحوظة الهامة، أما البيان الخطير فهو الآتي
أولاً: رجاء بص علي "تهييسات سابقة" في الجنب علشان تتأكد إنك قريت كل حاجة - ده لو عندك طقطان تقرا أصلا - و مفيش حاجة فاتتك .. خمسة بيكتبوا يعني فيضانات تهييس ..
ثانيًا: سيب تعليقك أبوس إيدك .. إدينا إحساس إنك جيت و مشيت، و إن شالله تشتم، بس يبقي في نفس في المدونة يعني ..
ثالثًا: افحت المواضيع التي تعجبك، علشان غيرك يعرف بيها
رابعًا: زيارتك شرفتنا و يا ريت ترجع تاني .. !
أما الاعتراف القنبلة فهو أنك بتعترف برضاك أو غصبًا عن عينك، قريت الموضوع أو ما قريتهوش، أو إن شالله حتي ما تدخلتش من أصله .. أنت بتقر و تعترف بالآتي:
بتعترف إن إحنا جهة غير حكومية أو أهلية أو شعبية أو سياسية أو اجتماعية أو رياضية أو أرضية أو فضائية أو من الدنيا دي أصلاً .. و إن إحنا لا نستهدف الربح بأي عملة غير الدولار - و ممكن الاسترليني - و إن إحنا بنكتب و نهيس من أجل التهييس فقط لا غير، اللهم إلا إذا كان من باب السخرية و النقد اللاذع ..
و بتقر و تعترف إن أي وجه شبه بين اللي كاتبينه و أي حاجة في سيادتك ماحناش مسئولين عنها .. أنت أدري
و بتقر و تعترف إن اللي عاملين المدونة دي عاوزين ضرب النار في ميدان عام ع اللي بيعملوه
و كفاية اعترافات علي كده أحسن شكلي حاجيب لروحي الكافية

و السلام عليكم و رحمة الله و بركاته
اللي عاوز يوقع، يمضي ف التعليقات