المواطن سيد المطحون

الراجل رمي طوبة ابنه
قام ابنه رماه بالطوبة
و مطرشق من جنابه بسبب بنته
اللي علي وش جواز و مخطوبة
و مراته طول النهار هات و هات
هرت بدنه م الطلبات
و بسببها أدوية الضغط و السكر و الجلطات
بقت مطلوبة
الراجل قرفان و مزنوق
متبهدل و مخنوق
مدروخ و مش عارف يفوق
تجيله الفلوس
يقولها سلامات
و يودعها بالشوق و الآهات

و نيجي ع الواد
سلامتها خلفة الولاد
الواد مضيع تلات موبايلات
و لزوم القيافة جاب واحد جديد
و متكلم بشيء و شويات
شحط طول بعرض، وديان و مرتفعات
و يمد إيده: "إيدك علي تمن المكالمات
و القمصان و البنطلونات
و الجزم و الشرابات
و الكوتشيات
و لو معندكش مانع، تمن السجاير و الولاعات"
"امش انجر من قدامي يا هلفوت
يا ابن الشحات"

طب نيجي ع البنات
يا مراره سكر النبات
البت يوماتي مع خطيبها
اللي هو مفروض راجل
الدون
بيصرف من جيبها
و البت قال إيه ولهانة
يخيبها
تتمحلس و تتمحك
و تبوس و تجندل
"بابا
إيدك علي تمن العزومات
و الأكل و المشروبات
و الخروجات
و تذاكر السينمات"
"يا بت الهبلة
كنت خلفتك أنت و اللطع ده
شبه اللي راضعين مغات ؟"

و بعدين أم العيال
تتزربن تخليها انقلابات
و تحول البيت ساحة معركة و صدامات
و هو يزعق و هي تزعق
و طاخ طيخ طوخ
و هاتك يا لكميات
و شخط و نطر
و نرفزة و بونيّات
و يوم ما يتصافوا
هاتك يا طلبات
"عاوزين سكر و فول
و لبن و بيض
و مسحوق غسيل
و جبنة مثلثات
و ما تنساش فاتورة التليفون
و الميه
و الكهربة
و تمن الكام بلوزة و الجيبات
و لو اتفضل معاك فلوس
هات بيهم فلفل أسود و ملح و شوية بهارات"
و لأن كل اللي فات
زيادة
و الطبر ما عادش ناف
كالعادة
الراجل من سكات
طق من جنابه
و مات .. !