حبــــة كلام

حتقولوا قول حبة كلام
أصل كلامك حلو وجميل
متعمر من العيار التقيل
لأ مش حاقول
حتقولوا : ليه ؟؟
و حقول غتاتة
هو الكلام بقى بالشحاتة
طب عدوا واحد .. اتنين.. تلاتة
كان فيه مرة واحدة وواحد
زي بعض مش فرق جامد
هو في ايده علبة سجاير
و هي واخدة الحجر عالطاير
على حل شعرها هو داير
لابسالي كاب و هو بضفاير
تشوفهم قاعدين فـ المدرج
هي بتضحك ! أصله بيهرج
هو دا فارس الأحلام
بطل ولا بوحه فـ الأفلام
عيل بجد قليل القيمة
أخلاق ايه دي دقة قديمة
-يابنتي انتي دماغك سليمة؟؟
طب و انت يابني
فكرتش مثلا لو يعني
كانت واحد من أخواتك
-و ماله .. احنا فـ عصر الحرية
ايه طلباتك ؟؟
عايزني أسوق الديكتاتورية
لأ براحتها
خليها تشوف مصلحتها
ماا هي أكيد حتبلغ عني
لو انا وقفت فـ سكتها
-طب فين النخوة والرجولة؟؟
-بطل نصايح
انت شايفني فـ سنة أولى
هز سيجارته وقالي راجـــل
مش لسه بالبس في الكافولة
شدته من ايده و راحت جراه
قام يجر رجولته وراه
-سيبك منه بقى يا دودو
و راحت لاعباله فـ خدوده
راح وراها يهز عوده
لأ راجل .. يرحم جدوده
بعدين يا شيخنا
ثم بعد اسبوعين
شفتها تاني
و دودو فين
راح دودو جاب مكانه اتنين
واحد شمال وواحد يمين
و بدل الضحكة ضحكتين
كيلو الأخلاق بقى بساغين
آه يا ليل يا زفت هباب يا عين