هيـــلا هـــــــــوبا

افتكرت واحد صاحبي كان يقوللي انه لما يتزنق في مسألة رياضيات كان يدخل الحمام .. و يأنتخ ع التواليت .. و يقوم بالوظيفة الحيوية الملائمة للمكان .. و فجأة الأفكار تيجي و هيلا هوب .. يطلع يجري يحل المسألة .. بعد ما يرفع هدومه طبعا ..حتقولوا يعني قارفنا بعنوان قد كده كسلنا نكمل قرايته .. و كمان بتقرفنا
لأ مش كده بس أنا بقالي مده مش عارف أكتب ايه .. و بعدين كنت نايم و صحيت أدخل الحمام .. بيت الراحة .. قمت أرتحت عضويا و فكريا نزل علي الالهام و افتكرت-و ده فعل مش بيحصل معايا كتير- موضوع كنت عايز أكلمكم فيه .. موضوع عن الكليه
فاكرين لما دخلنا الكلية .. كان كل واحد فينا فاكر نفسه الواد الجن .. كلمتين يقراهم كده و يدخل الامتحان .. هيلا هوب .. يطلع الأول على الدفعة و يتعين .. تجيله منحة.. يهج و يطحن نفسه شغل .. و هيلا هوب تاني .. جايزة نوبل و يبقى مشهور
على الأقل يعني ساعدك على كده ان أهلك و جيرانك و حبايبك و اللي حتى ما تعرفهمش منين ما تروح و تيجي ينادوك .. ازي الدوك .. عامل ايه الدوك.. و لا كأن سعادتك كنت في حرب مش في ثانوية .. و لا كانك اكتشفت بترول تحت شقتكم و دخلت الأوبك ..حاجة هبل
المهم بقى .. دخلت و برضه هيلا هوب لقيت على راسك نص مليون صفحة .. و لسه الناس بيعظموا ف الدوك .. هيلا هوب جت الامتحانات و عكيت و عديت و برضه بيعظموا في الدوك .. لكن المشكلة مش فينا بس و لا في الناس اللي بتعظم الدوك .. أمال فين يا فالح؟؟ في كل حاجةفينا و فيهم .. في نظاك التعليم .. من أول المحاضرة اللي 700 طالب في مدرج سعته 300 او 400 .. و الدكتور او الدكتوره الغلابة مش عارفين يسكتوا مين ولا مين .. اللي أخد سندوتش زميله و لا اللي زمياه عض صبع رجله .. و لا حيزعقوا في الولد و البنت اللي فاكرينه كاسيت موسيقى هادية و قاعدين بيحبوا في بعضا ..و لا في مين ولا مين .. فضايح .. المهم .. سييبك من النظري .. ده احنا في كليه عملي .. مش حاخش في الهيستو و البيو اللي احنا الكليه الوحيده في العالم اللي خريجينها بعد كده حيقولوا للعيان يعمل التغاعل و هما من الالوان حيعرفوا .. او يمكن نبقى بقى نعك فيهم .. اشمعنى يعني بتوع التحاليل هما اللي مش حيعكوا .. ولاد البطة السوده يعني .. حنسيب كل ده و حنيجي للتشريح .. اه اناتومي و لا انت تومي مش حوار مين فينا تومي .. المهم ان احنا عايزين نتعلم .. مش لازم كمان افتح العيان و اكون بالعب في كرشه زي الجزار و اسيبها زي ما تيجي تيجي .. أقطع حاجة كده ولا كده .. و لا أشيله رئه ولا حاجة .. ما هو عنده اتنين و مش مشكله .. حتى نعمل وسع للتانية تشتغل
المهم بقى .. كل اما افقابل حد من قرايبي اللي كانوا في طب .. سيسألني .. و بتشرحوا يبايدكم و لا؟؟؟؟ أرد عليه بالحكمة المأثورة .. هو احنا عارفين نبص .. يقوللي .. لأ هو ما بيقولش .. ده بيتحسر و يقعد ساكت .. المهم الظطلبة برضه ورا العلم بيجروا و يشقوا .. يرروحوا يهعملوا ايه؟؟ هيلا هوب ع المجموعات و نحوش ليه .. و اهاليكم يكعوا ما انت حنتظطلع دوك و تجيب الديب من ديله .. و الناس كلها كانت بتعتمد ع المجموعات ديو العيشة ماشية .. يراضونا بحبة علام و نراضيهم بحبة فلوس
هيلا هوب .. استيقظ الطلبه على خبر مفزع حتى ان بعضهم بلل فراشه .. ما تقولوليش مين علشان الستر على فلان و فلانه واجب .. المهم ايه الخبر .. مافيش مجموعات .. اتلغت .. خلاص شطبنا .. في كلالمواد بححح .. طب و احنا نشوف ازاي .. مش في سكاشن .. اهو الكلمة دي فكرتني ب"متقدرش" حتسئلوا ايه وجه الشبه .. ان الواحد يكون عارف اللي فيها و يستعبط .. و الطلبه على رأي كركرينا لسه ما يئستش .. حنخش السكشن و نشوف .. لازم نتعلم .. و اللي جرا ده حابقى اقولهولكوا في مرة تانيه .. بس ابقوا فكروني .. الموضوع ده حيبقى اسمه التطور العكسي .. المهم بقى بعد المصادر المطلعة ما بلغتني .. ان الناس اللي فوق اعطوا أسباب لالغاء المجموعات منها منطقي .. بس انت ما تجيش على شعب مش لاقي ياكل و قرب ياكل صوابع رجليه .. و تقوللي نعمله مهرجان كتاب و عايزينه يتثقف .. نفس النظام كان السبب الأول .. ان اللجنة اللي جت من اليونسكو .. و علشان يعترفوا بالكليه .. لاقوا المجموعات .. أخ .. يعني الطلبة مجبرة ان هي تروح المجموعات دي علشان هي مش لاقيه استفاده من الاصل .. و علشان السكاشن و المحاضرات مش بتفيدهم بحاجة .. و كعادة الانسان المصري الاصيل .. بدل ما يصلح النظر بالليزر يقلع النظارة و ما يشوفش عشان الناس قالوله شكله مش حلو فيها .. قرروا يلغوا المجموعات .. اهم حاجة الاعتراف بالكلية .. و اللي ما يتعلم مش مشكلة .. احنا عايزين طالب عالمي .. مش مشكله حمار .. بس عالمي برضه .. و العالميه دي شيء مهم
السبب التاني و ده مش على لساني بس على لسان جهات عليا .. ان مصلحة الضرايب عاملة مشاكل .. حتفتح بقك و تقوللي صدقتك في الأولانية .. بس دي وسعت .. حاقولك لا والله .. بيقولك الضرايب بتقول ان الدكاترة اللي بيدوا المجموعات دي بيتهربوا من الضرايب .. و علشان كده عايز بكره مظاهرة و نقول اخص على مصلحة الضرايب طبعا .. المهم .. فمصلحة الضرايب طلبت منهم كشوفات بالمجموعات من 2000 .. و العملية لاصت .. ربنا يستر ليلموا الدكاترة تهرب ضريبي .. المهم انا بقى اللي اكدلي الخبر لما افتكرت اما كنا بندفع المجاميع دي .. عمر حد اداك وصل .. ادوك فاتوره عليها الختم بتاع المحل .. عفوا الكلية .. لا .. يعني مش عيب عليك يا استاذ حسن تلبس الطلبة العمة .. و نصيحة لأي دوك .. الدايرة بتلف و ممكن تدوخ و سطها .. يا عم حتى اعتبرهم زكاة .. المهم .. يا خوفي بقى لنتخرج و نبقى عالميين .. ده اذا اعترفوا بينا أصلا .. و ما خدناش صفر زي صفر المونديال اما قعدنا رسمنا عليهم و فاكرين الناس دي غلابة زينا و حتصدق .. و بعدين نروح بلاد بره نرف راس بلادنا هناك .. و يجيلي عيان .. هيلا هوب .. البس البالطو و السماعة .. و هيلا هوب أحط ايدي على دماغه .. و أبصله بعمق .. و اتنهد و أقول : الحمد لله النبض سليم .. اديني دراعك بقى أقيس درجة الحرارة
و هيلا هوب يا جدع