من وحي اللحظة

لقيت نفسي عايز أكتب بس مش عارف أكتب ايه ! قعدت أفكر و أفكر .. و أريح من التفكير خمسة و أفكر تاني و برضه مفيش حل .. بيني و بينكم مش مشكلة بالنسبالي .. لكن الناس اللي بقت مدمنة كلامي دول لو ما خدوش الجرعة يتخاف عليهم .. تشنجات و تسمم و ترجيع .. حاجة تقرف - ياحلاوة .. معلش الحتة دي بقى جت كده .. في التلفزيون دلوقتي حالا .. كأس ايس كريم .. تمنه كام يا جدعان .. 25 جنيه .. ليه يعني انا قطعت كلامي علشان المبلغ ده .. لا و الله 25000 دولار .. حتقولوا عبيط و منه بس خد عندك .. فيه 18 من أندر أجود أنواع الكاكاو .. ايوه .. البتاع اللي ماما بتحطهولك في اللبن يبقى بني .. ما انتم مثقفين أهه.. و لو تعرفوا بقى ان ده اللي بتتعمل منه الشوكولاته .. مش كلها لان الشوكولاتة ممكن تتعمل صناعيا .. الأنواع النضيفة بس .. المهم يا جدعان .. هل الحكاية خلصت على حبة شوكولاته لأ والله .. أصلها متذوقة ب 5 جرامات دهب عيار 23 قابل للأكل .. و الله العظيم في ددهب قابل للأكل .. يعني تشتري لمراتك دبلة و شبكة منهو تبقى تشيلهم في التلاجة ينفعوكو في وقت زنقة .. بدل ما لسه تبيعه و تروح تشتؤي بتمنه .. تاكله علطول .. و الكاس اللي محطوطة في الشوكولاته .. بقولكم كاس مش بسكوتة خشب زي اللي بتلاقي جواها و انت بتاكل ورقة مكتوب عليها " صنع في مصر .. فخر الصناعة المصريه" .. لأ المهم الكاس ده مرصع بماسة و تاج صغنون من الدهب .. شفتوا العز .. كنت ناوي أكملكم عن حاجة كده بس لأ .. يا دوبك ألحق أروح أجيبها قبل ما حد يطمع و يسبقني بس معلش كان عندي طلب صغير .. أنا محوش 2 دولار .. ممكن حد يسلفني المبلغ اللي فاضل .. و حديله قطمة .. ما تنسوش انني ما قلتلكمش هي فين
سلام بقى علشان عايز أجرب أشوف ايسكريم الدهب أحسن ولا أيس كريم الليمون بتاع مكرم

الواد بتاع العسكريمة