أصناف وانواع!! الجزء التانى

تنويه:هذه الأ صناف والأنواع…… بعضها تنمية بشرية(علم نفس)….. والبعض الاخر هو رأى شخصى لى…….وكل ما فعلته أنى مزجت بينهم……أسيبكم تستمعوا بالقراءة.

كنا قد ذكرنا أن الناس فى دنيتنا هذه أصناف وأنواع……تمام كدة….. وأن الغرض من هذه التدوينة هو محاولة لسبر أغوار من حولك(انجليزى دة يا مرسى)… أو كشف نفسك قدام نفسك (حلوة دى)…. عشان تعرف أنت بتتعامل مع مين…..وكنا اتكلمنا عن القائد والغافل(بخصوص الغافل حتلاقى علماء الدين اتكلموا كتير أوى عنه…. راجع قصة أصحاب السبت)والنهاردة حنتكلم عن كذا نوع …. منهم نوع (الودود)…..النوع دة بقى حتلاقى عنده جميع أدوية الضغط والسكر والشرايين والقلب( بتاعته وبتاعت الناس)ودة عشان حاجة حنذكرها فى الاخر……. بشوش جدا ابتسامته مابتسيبش وشه……. حبوب أوى…..يحبك أوى….. وأنت كمان حتحبه(ماتفهمونيش غلط)……عاطفى جدا….. عاطفته تغلب عقله……الناس كلها تيجى تحكيله مشاكلها عشان هى بستريحله ….. وهو كله اذان صاغية….من الاخر وبتعبير اخر بيته مفتوح للكل( عشان كدة هو عنده كل الأدوية دى)…… وهذا النوع متمتل فى شخصية( ماما نونة) التى جسدتها ببراعة الرائعة كريمة مختار....... النوع دة أنت ممكن تحطه فى خدمة العملاء حيبقى ناجح أوى …. وحيظبطلك الكلام.
أما النوع الاخر فهو (المعبر)……. والنوع دة بقى شخصية من الاخر…. اجتماعى اوى اوى……. تلاقيه يخش أى مكان فيسلم على دة ويتعرف على دة ويدى كروته لدة( لو كان مهم زى حالاتى مع بالغ التواضع) ...... ويتكلم مع دة ..... ويعلق دة فى الكلام.... وبعدين يرجعلوا تانى(اية كمية دة اللى انت بتقولها دى!!!).... من الاخر هو حاجة كدة شبه مبيد ريد.... فهو ينتشر ويتكاثر ويستمر ويستمر ويستمر..... فانت مطرح ما تحطه...... يعمل صداقات ومعارف..... حتقوللى طب ماهو كدة شبه ( الودود)حبتين؟؟؟.... حقولك لأ يا خفيف.... الفرق أن (المعبر) بيحكم عقله شوية وبيخليه يسبق عواطفه......وأن صداقاته_غالبا_ ما بتكون مبصرة...... يعنى هو ما بيصاحبش لله وللوطن..... وفى نفس الوقت مش انتهازى....... ودة بقى ممكن تحطه فى العلاقات العامة حيظبطلك الكلام.......اه نسيت حاجة مهمة.... هذا النوع-لوأنت مدير فى حتة أو رئيس حاجة- تبقى غلطان من ساسك لراسك لو حددتله مواعيد .... يجى براحته ويمشى براحته ودة بيساعده على أداء شغله..........حتقوللى اشمعنى؟؟ حقولك هو كدة بيحب الحرية.

فيه بقى شخصية كمان متأسف أنى حتكلم عنها..... لأنها بجد شخصية مقرفة.....حتلاقيها موجودة عندنا كتير فى الكلية..... وفى كل حتة حواليك...... وهى شخصية (التابع).... أو اسمحوا لى أن أطلق عليه(الدُُهُلْ)..... فهو شخصية ممسوخة..... لا تجد له شخصية مستقلة.....لقى أصحابه ماشيين مع بنات..... قام قال" هيييه يلا نمشى"... تجد قراراته مهزوزة وغير مستقرة....لقى الناس بتشتم فى البلد والحكومة راح شتم..... لقاهم بيمجدوا راح ممجد..... ولعل هذا هو المشار فى قول النبى (صلى الله عليه وسلم ) حينما نهى أن يكون أحدنا إمّعََة إن أحسن الناس أحسن .... وإن أساءوا أساء.... ....... أنصحك نصيحة لله أن تبتعد عنه فورا فهو شخصية معدية للغاية.

أما الشخصية الأخيرة فهو شخصية (المُحلل)...... لو قررنا نعمل كلوز ونراقبه ..... حنلاقى مكتبه به خيوط العنكبوت...... يستخدم المعادلات والأرقام فى حياته وعمله لأقصى حد
ممكن ......... ما بيطلعش من مكتبه الا قليل...... ودة ممكن تلاحظه فى شخصية أى بابا من باهبهاتنا.........وحسيبك أنت تكمل الباقى...... دة أبوك أنا حاعرفه قدك......
يبقى مخطىء اللى بيتصور أنه شخصية من الشخصيات دى...... فكلنا هذه الشخصيات مجتمعة...... فانت ممكن يمر عليك اليوم تتلون بكل هذه الشخصيات..... ولكن تبقى شخصية واحدة هى التى تترك بصمة فى حياتك واللى غالبة على طباعك.... ممكن نقول أن دى شخصيتك............. عايزك بقى تمسك قلم وورقة وتحضر كوباية الشاى التماموتقعد تفكر وتحدد شخصيات زمايلك ..... اللى منها حتشوف انت حاتتعامل معاهم ازاى..... واخر نصيحة انصحهالك.... ماتخشش على المدونة دى تانى..... فبعد عناء التفكير أدركت أن كل المهيسين المشاركين من النوع الانتهازى( بما فيهم أنا).