إهداء لصديقي العزيز: المهيس الأكبر
عربيّ أناوهواي تركيّ
و عشقي لها
في القلب مطويّ
فليس من عابثٍ
شيطانٍ أو إنسيّ
رأيتها فعشقتها
و كأنه كان مقضيّ
فساكنةٌ و مالكةٌ أبـ
دًا كلَّ ما فيّ
أهوي هواها
و هواها عني قصيّ
فإذا الكون نورٌ
أمام عيني دجيّ
و إذا الرحاب ضيقٌ
و إذا الذكر نسيّ
و ما باقٍ غيرُ قلبٍ
كسيرٍ، و حبٍ مرثيّ
ملحوظة سابقة لأوانها: أعرف رأيك قبل أن تقوله يا سيادة المهيس، حتقولي "إيه ده، ده لا شعر و لا إحساس و أنت لا تعرف حاجة في الحب .. بلا نيلة" .. بس أحب أقولك إن الموضوع استهواني و القافية كانت شغالة مش أكتر ..
الدعاية كما لم تكن من قبل
هناك 25 تعليقًا:
الا يعنى ايه هواا تركى بجد دى اصلى رحت تركيا ومش شايفه ان الهوا التركى مختلف عن المصرى يمكن الاختلاف فى القهوة احتمال هههههههههههههههههههه
لا بجد قافيه جامده اللى انت كتبتها
لا يا ست آبي
الهوي هنا قصدي بيه الحب .. ده حوار كبير تبع عمنا المهيس الأكبر، حبيت أناغشه بس
و شكرًا ع المرور
ههه اللي ما يغرف الموضوع يجهله يا سي الدايخ .. بس بجد حلوة القافية و هي من القوافي الصعبة شويتين تلاتة .. أجمل حاجة فيها انها ممكن تندرج تجت أعظم هواياتي الحالية و هي مشاكسة المهيس .. تسلم ايدك يا عبد ، أعترف لك بقوة العربية في القصيدة و قوة الأسلوب .. بس طبعا انت عارف رأيي انت قصتك أحسن بكتير من شعرك ، مش لأن شعرك وحش بس علشان قصتك -من وجهة نظري المتواضعة على الأقل- مبهرة .. و كله من ايدك حلو يا سيدي ..
حدبحك يا عبدالرحمن ، أولا مليش دعوة بالشعر من الواضح إنك عارف رأيي كويس :)) ثانيا موضوع تركيا مش موضوع مفتوح للنقاش في المدونة وياريت نحترم بعض شوية ، القصيدة نفسها مفيهاش حاجة وحشة عهلى الموضوع ولكن تفتح الباب السكوبل وامثالة للـاليس وتفتح الباب للجدع وأمثاله للتسائل ، بعدين أحب أقولك يا(آبي)لا أعتقد أن الحب في تركيا يختلف عن مصر غير أي الناس اللي أعرفهم في مصر مايتحبوش خالص ومش لاقي واحدة تعوضني عن اللي فات وبصراحة مش عاوز ! اللي حيتكلم في الموضوع ده تاني انا بجد حزعل وحزعله مني بجد
متقفش كده يا بني آدم
روووووووووق
خده علي إنه هزار إخوات
بس بجد لو حتزعل
اتفلق !
هههههه .. قشطة عليك يا واد يا مدروخ .. أنا كده حاضمك لحزب مضطهدي المهيس الأكبر .. حابعتلك الاستمارة قريب .. سلام ..
يا حبيبة متخلنيش أغلط فيك ، هزارنا مع ع حاجة و الهبل ده على البلوج قدام الناس حاة تانية ، لما كلمت عبدالرحمن قالي انت اللي غلطان عشان كنت بتقولنا كل حاجة وبتفضح نفسك ، قلتله وبقولك عنده حق انا وثقت في الناس الغلط !!!
ايه يا عم .. أنت واخد الموضوع على اعصابك اوي كده .. بص القصة و ما فيها حبة مناكشة كده .. و بعدين اذا انت كنت شايف انك وثقت في الناس الغلط انت حر في رايك .. بس أنا من الأول قلتلك ان أنا حاسس ان الموضوع كان مجرد نشوة الشعور نفسه .. و أنا مش بأقول انك تحكي لحد ده غلط ولا صح لأن دي أفكار .. و أنا مؤمن بقدسية الحب .. و ان اللي بيحب أوي بيغير يتكلم عن اللي بيحبه .. الحب ده حاجة كبيرة أوي يابني .. تيجي كده اد تلات أربع صعايده في بعض :) .. و بعدين انت عارف اني بأحب أغلس عليك .. و العلاسة دي عن معزة .. ما تقلقش
كل التحيات
معلش لو انا هتدخل فى حاجة تخصكم مع بعض بس انا عايزة اقول للمهيس الاكبر انا مش عارفة انت ايه اللى مضايقك باظبط بس انتو كلكم عيلة واحدة بتكتبوا مع بعض و بتمشو فى الشارع مع بعض و كمان بتفضفضو لبعض و دى حاجة انا بجد بحسدكم عليها يا ريت تفكر فى الحاجة اللى ف ايدك و تنسى اللى راح منك و اوعى تندم على حاجة عملتها نصيحة منى امسك فى العيال المهيسة دى بايدك و سنانك لان لو ضاعو منك هتندم قوى صدقنى مفيش حاجة بتدوم قد واحد صاحبك تحبه و يحبك لله ف لله من غير مصالح و انا حاسة ده قوى ف مقالاتكم و التعليقات اللى بتسيبوها لبعض ربنا يخليكو لبعض
يسلم فمك يا أنونيموس
أنا بأقول له كده، هو برضه زعلان .. ربنا يهديه
معلش هو ممكن بس يكون مقالكم حسب كلامه فكره بحاجة هو ما كان صدق ينساها عشان كده مش فى المود بتاعه انشاء الله يومين و يفوق بس خليكو وراه هيسوا عليه شوية و فرفشوه اوعوا تسيبوه فى المود ده
بص يا سيادة الدائخ انا عهايزة اطلب منك طلب لو ينفع تديلى الايميل بتاع المهيس الاكبر (ده بعد اذنه طبعا) احاول اتكلم معاه يا ريت
حاجة تانى انا نفسى اشوفكم قوى انتو بتروحو المجمع امتى؟؟؟؟
لا يا ست أنونيموس
إحنا ف طب .. للأسف ما بنروحش المجمع تقريبًا ..
أولا أن مش زعلان من القصيدة وهي مفكرتنيش بحاجة لا سمح الله ولكن اللي زعلني ان حاجة وثقت فيهم وقلتهالهم عملوها موضوع للمناقشة في ندوة عامة ، وبصراحة يا استاذ حبيبة محدش طلب رأيك في موضوع الحب ومن الواضح إنك مصر على رأيم إنك البني آدم الوحيد في الكون اللي بيفهم في الحب و "الكلام والواعر ده " و إن إن كان عليا ان بروح المجمع لصحابي كل تلات ، انت جاي يا حبيبي تقولي اللي بيحب بيغير يتكلم على حبيبته ، تصدق بالله انا غلطان اني كلمتك في حاجة أساسا : أرجوك ما تحاولش تحجر على مشاعر الناس (بس أنا من الأول قلتلك ان أنا حاسس ان الموضوع كان مجرد نشوة الشعور نفسه ) وشكرا على المساندة على أي حال واظنك ملاحظ إن علاقتنا بقت رسمية من أول السنة ياريت تخليها كده ، ومتستهبلش وتقعد تقول أصل بحب اغلس عليك واهزر معاك انا مش قابل هزارك و أظن أن عاقتنا السنادي تختلف عن السنة اللي فاتت و لذلك ما كنت اتقبله من هزار السنة اللي فاتت مقدرش اقبلة السنادي انا بالنسبة للدائخ فهو صديق عمري و اقرب إلي منك ولم يحاول أبدا ان يسترسل في الإهانة زيك.
أولا لم نصنع منها موضوع لمناقشة عامة.. و لم يعرف أحد بأي شيء و لم يكن لينتبه أحد لشيء الا بعد أن أظهرت انت انه نهاية العالم
ثانيا أنا قلتلك ان أنا مش بأفرض رايي و انك حر .. أقرا تعليقي كويس
ثالثاأنا ما قلتش ان أنا البني آدم الوحيد اللي بيفهم ف يالكلام الواعر ده .. بس أنا قلتلك وجهة نظري اللي جواي .. و قلتلك أن لكل واحد نظريته .. في ناس بتعتبر ان الناس كلها تعرف عن اللي بيحبه ده اخلاص لأنه بيربط اسمهم مع بعض .. نظريات
رابعاأنا لا أحجر على مشاعر الناس بس أنا كنت قلتلك الرأي ده أيامها و مش جاي أبتكره دلوقتي .. و يا سيدي أحجر على مشاعرك ليه ؟؟ هي كانت كبرت و خرفت!
خامسا أنا ما كنتش ملاحظ انك خليت العلاقة رسميه .. أنا بس ما كنتش باشوفك كتير بعد ما انت اتشغلت في ال assa و كويس انك قلتلي ان العلاقة بقت مجرد زماله لا تحتمل مزاح و علاقة تدوين لا تحتمل حوار .. شكرا على المعلومة دي .. حتساعدني أوي
و لك كل التحيات
سادسا .. أنا لم أقصد ابدا التجريح و الإهانة أو الإستمرار في أي منهما.. لأني كنت غافلا عن تحجيم الصداقة الى زماله .. و هناك اشياء تقبل من الصديق دون سواه ،و اذا كنت أهنتك أو جرحتك فاليك اسفي و اعتذاري ، و اليك وعد مني أن يكون هذا آخر تعليق لي على هذا الموضوع ، و أن يكون أيضا آخر تعليق لي كـ"صديق"
و لك كل التحيات
ا سيادة الدائخ انا مقصدتش المجمع النظرى انا كان قصدى المجمع الطبى ده اولا ثانيا انا كنت عايزة اشوفكم عشان نفسى اعرف انتو عايشين ازاى بتفكروا ازاى و كده يعنى مش اكتر من كده حاجة يا ريت مكنش فهمت ردك غلط
المهيس الاكبر
انت ممكن يكون سكوبل او الدائخ زعلوك فى حاجة بس ده مش مبرر انك تقطع علاقتك بيه انا بعتذرلك تانى على تدخلى بس انا شفت فى كلامكم و تعليقاتكم على بعض حب كبير و عشم بينكم و بين بعض مينفعش تضيع كل ده من ايدك لمجرد انك حسيت انها فكرتك بحاجة و انا بكرر ده تانى لانك قلت فى تعليقك "لا أعتقد أن الحب في تركيا يختلف عن مصر غير أي الناس اللي أعرفهم في مصر مايتحبوش خالص ومش لاقي واحدة تعوضني عن اللي فات وبصراحة مش عاوز "من الاخر فيه حد انت حبيته و جرحك او كيفما كان الموقف حاجة تانى ردك على سكوبل كان عدائى زيادة عن اللزوم مع ان انا كواحدة شايفة الموضوع من برة مش شايفة فى تعليقاته اى حاجة غريبة عن الاسلوب اللى اتعودتوا تعلقوا على بعض بيه و اللى يمكن انت كمان علقت على سكوبل بيه ف يوم من الايام
سكوبل
انا كده تقريبا فهمت الاعتذار اللى انت حاطه فى المدونة بتاعتك مقدمه لمين بس انت برضه واحد من صحابه و لازم تستحملوا بعض شوية ممكن تعليقك يكون زعله حبتين تلاتة اربعة بس ده مش معناه انك ماتصدق يقولك مش عايز اصاحبك تقوم تقوله احسن برضه ده كان رايى
يا ريت لو كلامى فيه حاجة غلط قولولى بس انا بجد جربت احساس انك يكونلك صاحب قريب منك و تتخانقوا فتسيبوا بعض و للاسف انا معرفتش ساعتها اعمل اللى قلتلكم عليه مستحملتش و كانت النتيجة انى خسرت الانسانة الوحيدة اللى كنت معتبراها كل حاجة ف حياتى و هى كمان كانت معتبرانى كل حاجة ف حياتها
بس خلاص
أسمع يا حبيبة انا عمري ما قلت اني صداقتنا دي زمالة يا راجل انا سري معاك ، وبس انا بس كنت اتنمى انك تكون زي عبدالرحمن ، يعني شوية مراعية لمشاعري بلاش كل تلات كلمات تقطعل بكلمة "عيل " انا بس كان قصدي ياريت تحترمني زي محترمتك ولسة بحترمك ، وانينومس عندها حق انا مكانش قصدي بتاتا انهي العلاقة ثم إنك متعرفش ظروف كل واحد إيه ، انا في الفترة اللي فاتت دي ويوم الجمعة بالذات كنت في حالة زي الزفت تقدر تسأل عبدالرحمن ليه ، ليه الدنيا عندك يا إما نبقى صحاب نشتم بعض ( عمري ما شمتك وحاول كده افتكرلي واحدة) يا إما انا ابقى وحش وعايز انهي صداقة وعايزها زمالة ؟
( واظنك ملاحظ إن علاقتنا بقت رسمية من أول السنة ياريت تخليها كده ، ومتستهبلش وتقعد تقول أصل بحب اغلس عليك ) لو انا قصدي فعلا ان العلاقة بقت رسمية ماكنتش حقول متستهبلش ، انا كنت فعلا غضبان،وانا في حل من ذكر اسباب غضبي أمامك إعتذاري اقلبة او أرفضة وانت به او من دونه تعرفني وأني مكانش قصدي وانت اللي عامل فيلم هندي من الآخر !:))!!
إيه يا جماعة
ما كانتش قصيدة اللي كتبتها ..
و الله لو كنت أعرف كل البلاوي اللي حتحصل دي ولا كنت فكرت أصلاً فيها ..
يا نهار أحمر !
ربنا يخليكوا لبعض
*المهيس الاكبر:يمكن سكوبل يكون فهم كلامك غلط بس بامانة انا كمان لما قريت التعليق فهمت انك عايز تقطع علاقتك بيه و عشان كده انا قلتلك ان ردك كان عدائى
انت عبرت عن رايك بس بكلمات غلط
*بالنسبة للى انت قلته عن الشتايم انا عايزة اقول ان فيه ناس طبيعة هزارهم كده مع الناس القريبين منهم و بس و انا واحدة من دول يعنى هو مش بيبقى قصده يزعلك بيبقى بيناغشك و بس"دى وجهة نظرى"
*سكوبل: اعتقد ان المهيس وضح وجهة نظره يا ريت تفكر فى الموقف من اول و جديد
*الدائخ: اللى حصل كان كده كده هيحصل لان المهيس كان فيه حاجات مضايقاه منكم و كان محتاج يقولها قدامكم كل ما فى الامر ان القصيدة توقيتها كان متزامن مع حلة نفسية سيئة سواء للمهيس او غيره فكانت زى القشة التى قصمت ظهر البعير مش اكتر
جرى إيه يا انينوموس انت قلبت كلية طب نفسي ولا إيه ؟ هههههه ، على أي حال شكرا على روحك الجميلة ، الموضوع وما فيه إن كنت في لجنة منظمة لمؤتمر الجمعية العلمية ةكان الفيلم اللي انا عاملة انا والدائخ كان معايا النسخة النهائية وكان حيبوظ خالص ، شغل تلات شهور كان حيبقى في رقبتي ، ولو كان متعرضش كان حيبقى تقدري تقولي مصيبة ، يوميها دخلت على النت أجيب حجات عشانه شفت رد حبيبة , فرديت هذا الرد العصبي ، و النهاردة المؤتمر خلص بنجاح شبه ساحق والناس انبسططت والفيلم خلص قبل معادة بخمس دقايق و الدنيا ربيع والجو بديع و رجعت اعتذرت للراجل اللي ارجو ان هو كعادته مشالش منني ، يالا من شوفكومش في حاجة وحشة ويا ياريت يا ستي تبقي تقري قصاديي والبوستس القديمة بتاعتي ، عشان انا منقطع حاليا لعدة ظروق يطول شرحها ، إدعولي اشد حيلي ومسقطش السنادي :)))))) إن شاء الله مفيش سقوط ، إدعولي اجيب امتياز ، عشان تبقى مدونة الإمتيازات أصل مفيش غيري اللي جايب جيد جدا شفتي الخيبة :)))
اولا انا مش فى طب خالص انا ف تجارة و بالنسبة لموضوع الطب النفسى فدى بقى هوايتى من صغرى انى اقرا فى علم النفس اما بقى الفيلم بتاعك ف الف الف مبروك يا دكتور "اول ما ينزل السنيما قوللى عشان اشوفه:))))"
و انشاء الله تطلع بمرتبة و سرير و مخدة و لحاف الامتياز و ابقى اول واحدة تباركلكم كلكم ع النجاح00قول يا رب "بس انجح انا كمان بامتياز مش انتو لوحدكوا"
ثانيا بقى انا لما بدخل المدونة بصراحة بتوه و مش ببقى عارفة ابدأ منين لان كل شغلكوا جميييييييييييييييل من هنا لبكرة بس اوعدك انى اقراهم و اعلق عليهم كمان
بس خلاص
إرسال تعليق