كونتراست تناقض يعنى!!!

تنويه: باعتذر عن الغياب الطويل .... لكنها لظروف خارجة عن ارادتى والله.
ما دفعنى دفعا للكتابة فى هذا الموضوع هى مناقشة دخلت فيها مع أحد أقربائى...... هذه المناقشة فتّحت عينى على حاجات كتير أوى..... وبالمناسبة هذا الرجل يشغل منصب دكتور فى كلية تجارة أجد متعة كبيرة فى الحوار معه...... المهم أن الحوار كان عن ظاهرة صلاة التراويح خلف الشيخ حاتم فى رمضان- مش عارف اية اللى فكّره بحاجة زى كدة- المهم...... هو كان وجهة نظره أن هذا من أشكال التدين الفارغ...... ييجى الشاب من دول عامل بلاوى- والكلام على لسانه- وييجى يصللى وينهنهله نهنهتين-يعنى يعيّط- ويفتكر ان هو كدة عمل اللى عليه...... ردّيت أنا بكل انفعال وقلتله ان مفيش بنى ادم له الحق فى الحجر على رحمة ربنا وان أى حد مهما كانت بلاويه ممكن يتوب......... رد وقال لى ما تتحمقش أوى كدة.... الحكاية أخدت ما يشبه الظاهرة لدرجة ان الشباب والبنات كانوا بيتواعدوا بعد الصلاة!! وباصللى وقاللى ان التدين دة تدين فارغ من مضمونه ...... ودة قلته احسن ..... عندما وصل لهذه النقطة توالت امام عينى مشاهد الشباب وهما لابسين اجمد حاجة على الحبل وحاطّين المصلية على رقبتهم ...... لأ والانقح انك تلاقى المصلية ماشية مع الطقم .... يعنى انت لو لابس سويت شيرت احمر تبقى المصلية البيج عليك ايه..... تجنن...... أنا عارف ان فية دلوقتى أحد الأشاوس بيقول ان رحمة ربنا واسعة وهو مين هو عشان يصنف الناس كدة....... حقوللك اهدأ بس يا مان ..... دة أولا رأيه ثانيا أنا كنت زيك كدة ..... وبعدين فكرت وقلت ان الموضوع محتاج تفكير ودراسة ولا ايية؟

اللى أنا جاى أكلمكم فية النهاردة مش هو دة...... يمكن يكون لية علاقة بية........أنا جاى أكلمكم عن ذلك التناقض الصارخ الذى تعج به شوارعنا وحياتنا..... ويمكن يكون المثال السابق مثال لدة.............لأول مرة أدون وما اعرفش دة صح ولا غلط.......التناقض الرهيب اللى بنشوفه كل يوم فى حياتنا دة علامة صحية ولا اية؟تلك الشوارع الممتلئة بالباديهات ةالبنطلونات اللى بتتلبس مرة واحدة من كتر ضيقها ومليانة برضه بالنقاب والشادور..... هل هذا صحى؟؟ ذلك الشعب المتغنى ليل نهار بأيام عبد الناصر... أيام الكرامة العربية..... ماذا يفعل الان تجاه غزة وهى تحرق..... مع العلم أن بيدنا اشياء كثيرة بجانب الدعاء؟؟ ذلك المواطن الذى يلعن أبو الواسطة هل اذا لاحت له الفرصة فى تخطّى من أمامه فى طابور العيش وانه يجيب العيش ويخلّص نفسه..... هل لن يستغل تلك الفرصة الذهبية التى لاحت أمامه؟؟؟

أنت نفسك يا طالب الطب..... يا من تتشدق كل يوم بأن الطب وراثة وليس دراسة هل اذا عينت دكتور فى الجامعة وطلب منك أحد الاصدقاء اسداء " خدمة" اليه بأن " تراعى" ابنه فى الشفوى هل ستتذكر ساعتها ماكنت تقوله أم ستبرر لنفسك هذا التصرف وتعتبره فى اطار المؤمن للمؤمن كالبنيان؟؟؟ وذلك الرجل الهمام الذى يتشدق ليل نهار ويقول الله يلعن الحكومة عللى جابها مخللية البلد زبالة!! ثم تجده بعد ذلك يلقى بعلبة السجائر من نافذة سيارته!!!!..........هل ذلك الشاب الذى يبيح لنفسه معاكسة اللى رايحة واللى جايّة..... ثم اذا فعل ذلك أحد مع أخته يقيم الدنيا ولا يقعدها..... أليس هذا الوضع غريب؟؟؟ وذلك الرجل الهمام وكيل اول وزير التربية والتعليم رضا أبو سريع عندما يخرج علينا كل سنة- وقد خرج منذ اسبوعين- ويقول جملة حفظناها كثيرا حتى انهم فكّروا أن يمتحنوا الطلبة فيها" امتحانات الثانوية العامة هذا العام بلا مشاكل !!!"..... وتيجةى الامتحانات كل عام أزفت وأزفت!!

الواقع أيها السادة ان هذا كان النذر اليسير...... وما تعرفونه وما خفى كان أعظم!!!والواقع أنها تدل - فى المقام الأول- أننا شعب كلامنجى .... ما بيعرفش غير الكلام ... او بيتكلم اكتر ما بيشتغل..... ممكن اكون متجنّى شوية على شعبنا..... مش عارف لاول مرة أدون وما أعرفش الصح فين..... الا قوللى صحيح هو منين يودّى على فين؟؟؟