29.1.08

السياحة أهل البلد و ناسها

مش أنا يا جماعة كنت في رحلة ! .. اي و الله مش رحلة بالمعنى الحرفي للكلمة انما سافرت للقاهرة .. مصر أم الدنيا .. كنت يعني رايح لظروف خارجة عن ارادتي .. ما هو مش سهل عليا أتنازل عن كسلي برضه ..المهم اني رحت مصر ام الدنيا .. و نزلت في فندق 3 نجوم مع المجموعه اللي كنت نازل معاها و كانت عبارة عن فريق كبير من الاطفال اكبرهم 12 سنه .. الأغلبية 10 و تحت .. المهم .. تلات نجوم مش بطالة .. يعني مش لازم بسين في الشتا .. و هكذا .. لكن المشكلة ان أنا حتى الان باتساءل .. من أين أتت النجمات الثلاث ؟؟!
منذ بداية دخولي الفندق و اللي على فكرة اسمه يعني قصر قيصر.. كانت حوسة اذا أن مشرفي الفوج كانوا يحاولون ترتيب الغرف و من سيأخذ أي غرفة مع من و الكلام اياه .. ما كانش عندهم فكرة يرتبوا قبل كده .. فوت دي و عديها العدد كان فعلا كبير و محتاج تنظيم .. المهم تعالوا بقى نطلع الشنط للأوض .. و أخدت سويت 620 .. و معايا 5 أولاد مسئولين مني .. و اللي جابلي يخليلي.. طب تعالوا نطلع الشنط .. الأ سانسير المعجزة .. بيعلق .. لأن الباب لازم تعامله معامله خاصة و تفضل ضاغط عليه لحد ما حد ابن حلال يسحبه و الا تلاقيه علق عندك .. و الناس ما يعرفوش يستخدموه .. مش كده و بس ده ساعات كمان ما يعجبوش الدور اللي انت مختاره يروح جاي واقف بين الدور ده و اللي قبله .. و تفضل انت طالع نازل تجرب الأدوار لحد ما ييجي دور يعجب سعاده الباشا الوزير المحافظ الاسانسير ..و هكذا قدر لنا نحن البؤساء أن نتعامل مع هذا الاسانسير طالع نازل .. و مما زاد الطين بله انه لا يوجد سلم .. و اله العظيم ما باكدب بس فعلا مافيش سلم .. و الذي اتضح فيما بعد انه موجود و لكنهم مش عايزين يفتحوه .. تسألني ليه .. عشان الفندق عباره عن الأدوار الخامس و السادس و السابع من عماره .. و عماره مجاوره كامله .. و لما كان البائس هنا موجود في الدور السادس من العماره التي تحتوي على شقق سكنيه .. كان علينا غالبا أن نستقل الأسانسير مع كل مشاكله .. حتى من الله علينا و فتحوا السلم و ضحوا براحة السادة أصحاب الشقق السكنية في الأدوار التي لا يمتلكها الفندق و ذلك ليحققوا لنا راحتنا و يسمحوا لنا بالصعود على أقدامنا ستة أدوار لنصل الى الغرف الخاصة بنا.. و تتكرر المأساة عند اوقات الوجبات اذ يكون علينا أن نهبط من الطابق السادس للأول .. أما من عذاب الأسانسير أو بالسلم الذي كان حقا أقل عذابا .. ثم استقلال أسانسير اخر لم يكن بافضل حالا منه لتسعة أدوار أخرى في العماره المجاوره للوصول الى المطعم .. بين العمارتين كان في وصله تابعة للفندق كانت خاصة بالارصاد الجوية لأنها كانت غير مسقوفة فلما تشتي كنا نعرف ان الدنيا تشتي .. لأننا كنا فعلا بنتبل مننا للسما بقى ..يا اما كده .. يا اما نطلع الشارع من باب العماره اللي فيها ادوار سكنية و ندخل الفندق من الباب الأساسي و نكما رحله التسعة أدوار ..
نطلع المطعم و يا سيدي عاللي هناك .. أولا كراسي كتيرة مكسرة و مش مكسرة .. مش مكسرة لأنها سليمة و هي مرصوصة حوالين الترابيزات و شكلها شيك .. مكسرة لأن رجل واحدة على الأقل بتلعب كده و رايحة جاية .. لو سعادتك قعدت عليها ابقى اعمل حساب اللي حتقع عليه ..فوت دي انت خدت بالك و اخترت كرسي حلو و قعدت .. و جابولك الغدا .. و العشا ..فراخ .. يا سيدي .. فراخ .. شكلا .. كاوتش مضمونا .. عكعكه طعما .. و الرز مستوي و شكله شيك بس تحس انه بلاستيك .. بصراحة رغم اني مش باكل السلطة بره البيت .. الا ان السلطة كانت أفضل ما قدموه لي هناك .. اللهم الا مكرونه بالبشامل كانت ذات طعم طبيعي .. استمتع بها الناس جميعا و كانها مكرونه الجنه و بشامل الفردوس .. ناهيك عن الافطار اللي كان الطبيعي فيه بيض مسلوق و فول .. و بعد الفطار كان الدلع كله شاي و نسكافيه و حليب كمان عشان تعدل الدماغ .. لكن ان كنت من هواة عدل الدماغ .. اعدلها و انت مغمض عنيك .. عشان الفناجيل اللي متوفرة مغسوله باهمال لدرجة انها تحتوي تفل من بقايا عدل دماغ من سبقوك !
نسيت يا جماعة .. هو تقريبا المطعم كان متغاظ من المطعم الصيني اللي بجوار الفندق لأنهم كانوا بيخلونا ناكل الرز بالشوك .. الا اذا انت طبعا كنت بتقاطع الصين و اصريت انك تاخد معلقة .. يا بختك ياللي وصلت للمعلقه
المطعم غير معزول عن البار المجاور بحيث يمكن أن تختبر ذكائك و قدرتك على تمويه الموضوع .. لما حد من العيال يسألك .. هما بيشربوا ايه جوه .. و انت حتقوله ايه .. عصير بطيخ .. و العيال يمشوا بيضحكوا في سرهم لأنهم حسوا انك أهبل و مش عارف تقولهم ويسكي ..
وكفايه كده عليكم .. انما باحب افتكر كلمة واحد قاللي .. و ده واحد من المصادر المسئوله في الفندق "العمال" انهم قريب حياخدوا النجمة الرابعه .. أنا حاسيبلكم الحكم .. بس على فكرة .. أنا دورت على أي فندق مجاور يكون بيسلفهم النجوم ما لقيتش .. ساعتها بس .. و بس ساعتها .. افتكرت الكلمة التاريخية .. السياحة أهل البلد و ناسها .. نبقى نشيل السياح أوبح و نطلع بيهم .. و نبقى ناكلهم بايدينا و هما مش حياخدوا بالهم من الطعم .. و المصري عظيم .. و عظيمة يا مصر .. و مصر بلدنا بلد سواح فيها الأجانب تتبهدل

27.1.08

روبابيكيا

روبابيكيا
حاجات قديمة للبيع
كراكيب قديمة للبيع
بيكيا

معايا طالب مالوش مطالب غير أنه يغالب الكتاب اللي كابس علي نفسه
و معايا أستاذ متبهدل و محتاس ما عارف له رجل من راس بالمرتب اللي وكسه
و معايا كام خريج فافي قوي و معاويج مالهومش غير ف التهريج إلهي يتوكسوا
و بيكيا

معايا دكتور ما يفرقشي عن التور ما شافش ف حياته نور الطب كل دماغه و لحسه
و معايا كام وزير الواحد شبه الغفير مالهومش غير سواقة الحمير إلهي يتكنسوا
و معايا حزب حاكم خبيث و يتلائم و يتزنق يتشاتم مع كل من كبسه
و بيكيا

معايا مهندس كبير و متهندس قاعد و متحنس بالعلم اللي فرسه
و معايا خريج زراعة مقضي دنيته صياعة بينام بالاتناشر ساعة و حالته المادية فلسو
و معايا تاجر دماغه م المحاجر يغلي السعر و لا يتاجر و الناس منه اتهرسوا
و بيكيا

معايا ملياردير كرشه يشبه البير مالوش قرار و كبير تترص فه الملايين ما يترسوا
و معايا شيخ جامع عامل فقي و هو طامع ماعندوهشي مانع يشوف شويتين نفسه
و معايا ظابط مالوهشي رابط يطيح و يتلابط و اللي يعارضوه يترفسوا
و بيكيا

معايا أساتذة جامعة دخلوها زي الشمعة طلعوا شبه أبو لمعة من شغل المدرجات اتلحسوا
و معايا قاضي قاعد و فاضي مالوش ف التراضي نص البلد من تحت إيده اتحبسوا
و معايا محامي ضلالي و حرامي ديفيد كوهين و الاسم رامي شحور ف المحاكم كل اللي درسه
و بيكيا

معايا محاسب ما يراعي و لا يحاسب مظبط نفسه مكاسب لو يقع تحت إيده مليم يختلسه
و معايا معارضة كورة ف العارضة الميل قد الياردة من كتر الدبابير اتخرسوا
و معايا صحافة عصعصة و نحافة راحن القرافة كل الوعود ليهم اتلحسوا
و بيكيا

و معايا بلد
خلفت مليون ولد
عيشتهم طوالي ف نكد
ادعو لها بالسلامة
دا لولا الملامة
كانت صوتت بالحياني
و خلتها زيطة و قيامة
و هنيالك يا فاعل الخير
يا اللي تدعي معانا من غير تقصير
علي كل من قر عليها و حسد
و رزع فيها و هبد
و جابها ورا بكل تلامة
و روبابيكيا
بيكيا

25.1.08

قصيدة أنا المصري كريم العنصرين

قول يا أبنودي يا عمهم يا حارق دمهم

لا تقولي حداد ولا سرور ولا نجم

يا أبنودي انت الأصل والباقي تقليد

24.1.08

جهاز ضغط و سماعة - الحلقة الثالثة


قال أنا إيه كان عندي امتحانات .. و قال إيه اتخزوقت


آسف علي اللفظ و الدخلة المهببة، لكنه الواقع الأليم .. للأمانة لم تكن كل الامتحانات بهذه الصورة .. فقط مادة الكيمياء .. لكنها كانت من العيار الثقيل .. جدًا ..
المهم أن هذا الموضوع و بعيدًا عن الخوازيق فتح شهيتي لأكتب عن موضوع تمنيت منذ زمن أن أفهمه .. هم الدكاترة بيعملوا معانا كده ليه ؟ .. ما هو المبرر الموضوعي و الأخلاقي و الإنساني لما يحدث ؟
المشكلة أن هؤلاء الأساتذة إذا بحثت فيهم عمن يمكن أن تطلق عليه أستاذ جامع فلا تجد إلا القليل .. فلنفرض أن مستواهم العلمي متقدم للغاية و أنه لولا البخت المنيل كانوا اترشحوا لنوبل .. لنفرض هذا، لكن قلة منهم هم من يحملون المقومات الأخلاقية لكي نطلق عليهم أساتذة جامعة .. فالأستاذ الجامعي في النهاية هو مكانة اجتماعية قبل كل شء .. دعك من أن مرتباتهم في النازل و أن مرتب أستاذ الجامعة لا يكفيه تلميع حذائه كل صباح .. لكن هذا ليس له علاقة بمسألة التعامل ..
و حتي لا يكون حديثًا مرسلاً سأضرب مثالاً وحيدًا أراه معبرًا أشد التعبير .. أستاذ في قسم التشريح، حاضر لنا ذات مرة العام الماضي و قلبنا في أربع ما محاضرات ما ينبغي أن يُفرد له - بالميت - ست محاضرات إن لم تكن سبعًا .. ثم حدث أن دخل مرة أخري قرب نهاية العام فما كان منا إلا أن خرجنا، أو خرج معظمنا و ما كان منه عندما رأي هذا الرفض الشعبي إلا أن قال و بالنص: " و حياة أمي اللي حيدخلي في الجزء ده في الشفوي لأكون مسقطه " .. لا تعليق
ثم بعد كل هذا تواتيهم البجاحة كي يهرسونا ما بين امتحانات خاوزقية الشكل و المحتوي، و ما بين جداول امتحانات لا تصلح إلا لكي تجعلك ترسب، ثم تواتيهم البجاحة أكثر لكي يعلنوا تذمرهم من مستوي الطلبة الذي هو في انحدار مستمر .. عجايب !
أنتم من الأساس لم تقدموا مستوي خدمة تعليمية يقبل به حمار أن يتعلم كيف يجر كارو، فما بالك بطبيب سيكون بين يديه أرواح بشر الله أعلم حينيل فيهم إيه، و لا يخفي عليكم مستوي أطبائنا المبهر زيادة عن اللزوم ..
نهايته .. هي بداية مش لطيفة أرجع بيها بعد الغيبة الطويلة دي .. بس أنا فعلاً اتخنقت .. و للعلم هذا ليس شعوري وحدي .. بل هو شعور ما يقرب من 1300 طالب و إن اختلف مستوي الحنق المجري الذي يعتمل في صدورنا
و كل سنة و أنتوا طيبين بمناسبة كل المناسبات اللي فاتت و ما عيدتشي فيها عليكوا ... و سلام

قصيدة الترابتيك

ترابتيك


إهداء ..

إلي كبيرنا الكبير الشيك
أنا
و نيابة عن كل الصعاليك
بنبايعك،..
وبنهتفلك ...
وبندّيــك
أصواتنا ...
وأقواتنا...
و
بلد تمليك
ونقول ربنا يحميك
ولبلدنا يخليك !
**
قصيدة
ترابتت تاتت تيك
**
مقدمة
ع الكرسي كده متسلطن
ورجاله زيه وألعن
بيثور ويسب ويلعن
في الحكم ماله شريك
**
ورجاله زي الفرقة
بيغنوا وراه وبحرقة
ويقولوا علينا السرقة
وحلال النسبة عليك
**
ورجاله يقولوا قاسينا
سرقنا وياما جرينا
أما البيع فعلينا
وأما الحكم ده ليك
**
وحبيبه جماله جمال
في الكلمة ماله مثال
و التاني عال العال
استاذ وبطل أبطال
أستاذ علم التسليك
**
و الشعب عنده مواشي
الرايح راح ولا جاشي
والعَسَلي بيقول ماشي
ده حبيب ولا يتوصاشي
خلاهم حمام بفريك !!!
ترابتيك ترابتيك
ترابتت تاتت تيك
**
نص النشيد
**
فنساء وعيال و حيتان
بنبايعك على الأوطان
ونقول اسرقنا كمان
و أحكمنا لفترة كمان
أقبلنا الله يخليك
**
طب وحياة الأولاد
وحياة علا و سعاد
ما تسيبنا للأوغاد
ولا واحد قواد
بيقود العالم أجمع
لبلاد الأجداد

طب وحياة الأحفاد
ما تسيبنا للأحقاد
ولا بتوع الشعارات
ولا بتوع التفليك
**
طب وحياة الأعداد
اللي بتقولك يا عماد
عمدان النهضة شداد
لا تسيبنا للجلاد
نضفنا إعملنا جُداد
نضفنا بحمض وفِنيك
**
طب وحياة الأجيال
ورجال الأعمال
وكروش زي الأفيال
ما تسيبنا للأندال
و الزمة الأستيك
**
طب وحيات المعونات
و اتفاقيات الجات
حلفتك بالعمولات
وبتوع الأحتكارات
ما تسيبنا للـــ (بيــــــــــــــــــــب)
وبتوع التدليك
**
طب وحيات الملوخية
و الفول والطعمية
وعيشة الرفاهية
ما تسيبنا للحرامية
وبتوع الترابتتتيـــــــك
ترابتيك ترابتيك
ترابتت تاتت تيك
**
طب وحياة العبارة
و الكام ألف عمارة
واللي عايشين في الحارة
واللي راكبين تكاتيك !

واللي غرقوا في مركب
واللي هربوا في طيارة
واللي ماتوا في بحر
ولا اتسجنوا في بر
واللي عايشين بالنصب
واللي عايشين بالجر
واللي عايشين في سكون
ضد العايشين في سجون

واللي عايشين بالشد
واللي عايشين بالرفع
واللي عايشين بالضرب
واللي عايشين بالجمع
غير العايشين بالدمع

و الجمع ده كله حضارة
والضرب ده كله حضارة
والشد ده كله حضارة
والرفع ده كله حرارة

و الدمع عياط بمرارة
على حالنا من بعديك

ترابتيك أكل التيك
خرب التيك
خربتت تاتت تاتت تيــك

آخر قصيدة للشاعر الكبير
احمد همبكا

أياذا القلب لا تحزن فذاك الحبّ Infection
فلن تجدي عقاقير ولن يشفيك Injection
فكم من عاقلٍ فطنٍ مضى بالحبّ Direction
ستنكرهُ وتنساهُ ولن يبقى له Mention
فلا تكتب له شعراً ولا تكتب له Section
ولا يحزنك من باعك فقد أخطأتَ Selection
ولا تبدي له أسفاً ولا تبدي له Action
فإن الحبّ منزلةٌ لبعض الناس Exception
وبعض الناس إن هجروا فلا حزنٌ ولا Tension

منقولة بس أديني أول واحد أكتب بعد الانقطاع بتاع الامتحانات قولولي رأيكم
معلش أديني عدلتها أكيد انتم عارفين الامتحانات عملت فينا ايه :S:S

Related Posts with Thumbnails
 
Share
ShareSidebar