22.2.09

هجاص و لكن بالصدفة

اسكتوا يا ولاد ، مش أنا اكتشفت اني هجاص .. أي و الله ، بس مما خفف وقع الصدمة على قلبي النونو اني اكتشفت انني هجاص بالصدفة نعم بالطبع لأ .. باكتب كلام غريب أنا مش كده .. اه ما انا عارف ، ماهو لكل واحد اسلوبه في التشويق ، و ان كنت ساعات لما باقعد اكتب و استخدم اسلوبي المبهم المكعبر ده في الكتابة ، باحس اني باعمل تشويق لنفسي أنا بس و ان الناس التانية عند النقط اللي بتعجبني أوي لدرجة ان ابتسامة خفيفة بترتسم على وجهي ، باحس ان عند الجزء ده بالذات .. اللي بيقرا بيبقى منفوخ جدا و عايز يبعتلي فيروس يرحم البشرية الالكترونية مني ... بس بافضل اكتب و ازود في النقط اللي من النوع ده و اكتر منها ، مش عارف ليه ، جايز باستخدم سياسة الاقناع بالاغراق .. زي اللي استخدمها التلفزيون المصري في فرض حب مصر علينا من حوالي سنة أو سنه و نص ، لما كان كل خمس دقايق اغنية وطنية ، في الفترة دي حتى ظهرت وطنية المطربين الجداد ، و الولاد هرونا من أول ماشربتش لحد لو كنا بنحبها .. و أوقات تانية لما باستخدم الاسلوب ده في الكتابة ... و باقعد انفخ على القاريء ، باكون باعيش لحظة من لحظات استمتاعي بالسادية .. هو انا ما قلتلكمش ان انا دخلت كويز من الكويزات اللي ع الفيس بوك ، و طلعت نوعية نادرة جدا من القتله .. اللي بيقتلوا عشان يستمتعوا بمنظر عذاب الضحية ... و ممكن يكون السبب ورا اسلوبي ده هو استمتاعي بالكتابة ، اصل انا حاعترف - يلا ماهي باظت خلاص- ان أنا باكتب عشان أنا باحب الكتابة مش عشان التزام كتابي أو التزام نحو القاريء ، لكن بأكتب لأني لما بأكتب بأحس بكتعة الكتابة ، ازاي من شوية حروف قدرت أعمل جملة ، و موضوع بابسط بيه القراء ساعات ، و أوقات تانية بأعذبهم ... طبعا ما بيكونش قصدي ... طب و ايه حكاية هجاص دي ؟؟ و هما الهجاصين أنواع ؟؟ استنوني في المرة الجاية اللي اتمنى انها تكون قريبة ...





هناك 3 تعليقات:

Unknown يقول...

هومنين يودى على فييين ؟؟... شوقتنى ..... لأ بجد شوقتنى ...... حلوة يا حبيبة .... بس التفافك حول الموضوع ولفك ودورانك .... دة اكبر دليل انك هجاص كبييير!!!!!

غير معرف يقول...

أخدتنا في دوكة يا معلم
قلت ها، خلاص الواد حيعترف هو هجاص إزاي، أقعدت تكلمني ع سياسة الإغراق و مش الإغراق ..

لو المرة الجاية مفيش حاجة، حتبقي هجاص رسمي، مش بالصدفة

Khadieja Eshra يقول...

من زماااااااااااااان مدخلتش عالم المدوناتزبس قلت النهاردة اخدلى غطس و ابص ع الناس اللى انا مشفتهمش بقالى قرون و يمكن كمان يكونوا نسيونى
المهم يا سكوبل انا عايزة اعرف ازاي وصلت للاكتشاف الرهيب ده و يا سيدى انت ممكن تغلس علينا زى ما انت عايز كل واحد حر فى مدونته يا سكوبل

Related Posts with Thumbnails
 
Share
ShareSidebar