أوبن بوفيه

اتكلموا
هنا الكلام أوبن بوفيه
مفيش حساب على قلت ايه
و ان كان حتى يعني ايه
كوارع ولا سيمون فيليه
و مامته بتقوله أبيه
عملاه كبير
و أقولك على سر خطير
لما البقر خلص نعير
قام سيادته من ع السرير
ولاقوا ف وسط الصحرا بير
و جوه البير في فانوس
لو يوم طلعلك تبقى منحوس
ادعك الفانوس و سلخه
و فصفصه و سلخه
بس أوعى يابني توسخه
و تقول أمركش رخرخوه
ظغطه و ظبطه و أنتخه
حتسمع صوت
تراخ تريخ ترخرخوا
يطلع عفريت ما شاء ألله عليه
يقول شبيك لبيك يا بيه
ايه اللي نفس سعادتك فيه؟؟
-عايز للصعايدة مخاخ ياباني
و مراتي تبقى عروسة ألماني
و حته جلاكسي من أبو سوداني
-هاهاها أوأو ، طب ابقى القاني
لو جابلك حتى فراخ بانيه
أو حتى كاوتشه من الكوبيه
أصل العفريت ده عنده زكام
ممكن تطلبلك 2 برشام
أو يحكيلك حدوته تنام
أو تطلب سينما وجوزين افلام
منهم فيلم يطلع أكشن
و الليله و بكره عندنا سكشن
يا عيني يا ليلي ع السسبكشن
و شفتوا الواد ده علانياته
فزلوك يا سيدي على بركاته
ابن أخته بيطلب ايد حماته
شفتوا البتاع لما ضاع
و ابن الجيران باظ و صاع
و يوم الوداع
جالي ف دماغي صداع
و حاخد حقي بالدراع
و الأرنبه هي المركب
و الودان هي الشراع
ما تبطلوا شريعة الغاب
عاملي فيها ديكتاتور على عيلك!؟؟
و مكشرلي عن ألف ناب؟؟
ليلتك هباب
ده أنا حافرمك و أبهدلك
و أعورك و أشحورك و أدغدغك و اجرجرك
و أعملك صباعين كباب
اهه كه تروح انت و الغابة
و نأكل لحمك للغلابه
نزيل عنهم بعض الكابة
و ليه يابني تعيش حزين
بصيت شمال، بص يمين
تسمع جرس و خبطتين
و ده يبقى مين؟؟
عبد المعين
و معاه سعاد ، لولو و شيرين
و لانتوا متفضلين
معلش اه الوقت ثمين
ماتعرفش انا ابقى ابن مين؟؟
ده برنه وحده لدادي فادي
أو رنه لمامي أولى
تلاقي نفسك في أمن دوله
ماتش القفيان كان كام جوله؟؟
يااه
ما كانش غير جولتين
يلا بقى .. ادوك سماح
و شفيقه بتطلب ايد صلاح
بيقولوا انه ما وافقش
بيحب واحدة اسمها صباح
لا تعبت ولا حترتاح
سداح مداح
اهه جه وراح
و لا رجعشي
عاملكم حلة محشي
و اكلة كوارع
محشي فزدق و مهلبيه
براحه عليا
شويه شويه
يا عالم يا مفتريه
هي السعاده كشك و انتوا البلديه؟؟
و لا انا موقوف لمعاداة الساميه؟؟
و الله ولا أعرفها
لا ساميه ولا أخوها
و لا حتى مرات أبوها
مش تبعي اللي كهربوها
و لا أعرف اللي ضربوها
ليه اعدام يا باشا؟؟
ده انت أطعم من حتة البغاشا
طب أدي دليل برائتي
روح بيتنا
و بص ع الشاشه
حتلاقي تهييسة
لا ليها معنى و لا هدف
بس قلبي على كتابتها اتلهف
بمناسبه ايه؟؟
معقوله مش عارف يا بيه!!؟؟
بمناسبة ان ده الموضوع
المزروع الملطوع البتاتوع
أبو نفس مقطوع
حامي العلم
مكتوب من غير قلم
صاحب الرقم
100