تخاريف صيام

فاضلي نص ساعة صيام و أفطر .. يعني الساعة ستة و نص لما بدأت أكتب .. مش لاقي حاجة أعملها .. و بما اني باحاول أكتب من شهر و كل ما أكتب تلات سطور أقف و الحنفية قافلة تماما .. لكن أنا نسيت أعيد عليكم في رمضان .. و أهي جت متأخرة شوية .. بس أنا حاسليكم و اروقكم و اهون عليكم النص ساعة الاخيرة .. اه أصلها نص ساعة مهمة أوي .. تعدي بالراحة لكن أجمل نص ساعة من أول اليوم .. لأنها رغم انها قمة العذاب و الشعور بالجوع و التعب و العطش ، رغم كل ده هي بتنتهي بالأذان و الفطار .. و ألاقي الحاجة والدتي بقى عامله ما لذ و طاب .. النشويات بقى تلاقي رز خلطة و المكسرات بتلعب على وشه و بتقولك تعالى كل و قزقز .. و مكرونة اسباجيتي تشفط عيدانها زي ايام زمان و انت صغير و تفضل الصلصة على بقك زي أحمر الشفايف .. و يا سلام بقى على برام كده يحبش وسطهم .. و الكسكسي تأكلك منه معلقتين و بعدين تقرر انه لازم يتبلع بشربة الضاني تمد ايدك و تشرب شوربة و تبلع تحس كأنك ولا كلت أي حاجة لغاية دلوقتي .. و تلمح جنب الشوربة طبق السلطة .. تأخدلك كام قطمة عشان تثبت لنفسك انك ماشي ع الريجيم و ملتزم و بتكتر من السلطة .. لكن فجأة عينك تيجي على صينية بطاطس باللحمة .. حاجة كده مسبكة و مليانه دهون .. بس هو في دهون زي الضاني ، تمد المعلقة في الشوربة و تطلع قطعة اللحمة الضاني الغرقانة تحت .. و تقطم منها كده ، يا سلام ، و الله ما في أطعم من كده .. تقولها و انت مبسوط ترد عليا الحاجة .. " امال لو دقت البطة " .. أمد عيني لمنتصف المائدة لأجد دكر بط بحجم الرومي متربعا كملك ينتظر من يزيحه عن عرشه .. فأقرر أن أكون من يفعل هذا و لكن تسبقني يد أمي لتقتطع وركا من هذا الملك .. و تحطه في طبقي .. و في ثواني تلاقيها وصلت بقي و راحت في غياهب جهازي الهضمي .. تجري ايدي على طبق المخلل أكل كام جزرة مخلله و ادوق اللفت ، يفتتح نفسي كمان أمد المغرفة و اخدلي شوية رز بالمكسرات .. و أجيب شوية بامية باللحم المفروم و أقعد أعمل قطمات منهم هما الاتنين .. أشرب شوية شربة عملا بنصيحة الصعيدي اللي قال لجدي الله يرحمه " كلها لحد ما تضيق و زرقلها الميه تزريق " بس الشربة الضاني تكتم على نفسي أكتر .. أمد ايدي و اصب كوباية قمر الدين و أشرب و انتعش أستعدادا لدورة جديدة من الأكل .. أحط حتة فراخ بانيه في نص رغيف و أكل و أستمتع ..و في نص السندوتش أفتكر اني نسيت أحط بطاطس مقلية معاه أروح جاي مالي الرغيف بطاطس لحد ما تختفي قطعة الفراخ البانيه .. ودني مع التلفزيون أسمع ظاظا و جرجير جاي .. أعملي سنوتشين كباب في طبق و أخد حتتين جلاش و شوية كفتة داوود بدمعتهم و أجري ع التلفزيون .. بس الامدادات دي ما تكفيش و أقعد محتار أروح أجيب كمان و لا اتفرج على ظاظا .. في النهاية أوصل لحل وسط هو اني أتسلى بالحلو لحد ما يخلص ظاظا و بعدين أروح أكمل.. أمسك طبق القطايف و واحدة تجر اختها و اختهم تحصلهم و مع شوية كنافة على حبة أم علي .. أحس اني نفسي اتكتم .. أجيب جوافياية و أقعد اقطم منها و أنا مستمتع جدا .. أشاور لأخويا الصغير يناولني طبق بلح الشام و لقمة القاضي .. يديهولي بس ياخد قصادهم طبق القطايف .. مش مهم ،عشر دقايق و أحس ان بطني عجنت من كتر بلح الشام أمسك شفشق الخروب و اصب كباية .. أخويا يقوللي استنى ده انا جبت سوبيا و مسقعها في التلاجة .. أقوله صبلي معاك .. بس بايدك ناولني طبق الحلويات الشرقية اللي جابوه الضيوف امبارح .. و معلش بقى مش حاقدر أكملكم علشان أذان القاهرة اذن أهه و لازم أستعد .. أنا ماسك شفشق قمر الدين و باصب كباية عشان اشق ريقي .. أصبلكم معايا ؟؟ عنيا بس ناولني واحد رز بلبن بايدك

*ملحوظة ع الماشي : ما كتب من وحي الخيال و ليس سلوكا صحيحا لقوله تعالى فيما معناه " و كلوا و اشربوا ولا تسرفوا "