11872

طبعا كالعادة لازم أقولكم معلش اني بقالي مده ما باكتبش و اقولكم اننا كان طالع عيننا في الفترة اللي فاتت ، و اقعد اجيب الحجة ورا اختها عشان نصعب عليكوا و تسيبولنا تعليق وانتوا طالعين تواسونا بيه ، لكن انا حافكس لكل الكلام ده و حاقولكم ان انا اتبسطت اوي النهارده لما فتحت تهييسة ، بعد مدة الامتحانات و زنقتها ، و اللي - الحمد لله - الكمبيوتر كان فيه بعافية ، كانه كان بيقوللي كفايه كده لاحسن حاتلبس ، المهم ان انا اتبسطت اوي لما بابص و لقيت في عداد الزوار الرقم الطويل ده 11872 و ياي على مشاعري ، يعني انا عمري ما كنت افترض ان خمسة ستة ممكن يقروا اللي انا باكتبه ده ، و لا كنت اتصور .. طبعا انا مش باكتب لوحدي ، لكن القاريء مجبر يقرالي انا كمان ، خصوصا ان انا الوحيد اللي بيعرف ينفخ عليه صح و يخليه يقعد يقرا مده من غير ما يفهم حاجة و بعدين يتغاظ مني و يدعي عليا .. المهم للمرة التانية ان انا ما كنتش اتصور ان قراء تهييسة حيوصلوا العدد ده ، و اللي بجد اشكحني معنويا و نفسيا و تهييسيا لدرجة اني بافكر اجيب ورق صنفرة و اصنفر مركز الابداع اللي صدا عندي .. و ارجع اكتب تاني - سامعك ياللي هناك بتقول و ليه بس كده يارب ، ما كنا مرتاحين - لكن انا برده استغربت و احتارت قملتي ليه لو عدينا التعليقات مش حتعدي ال200 نصهم بتوعنا احنا ، فهل ياترى السبب ان كتابتنا - او على الاقل كتاباتي- مملة للدرجة دي ، و لا هو الكسل الطبيعي اللي بتتزايد معدلاته و حتعدي نسبة العنوسة ، و لا ايه بالظبط .. انا بجد نفسي احس بالمردود .. يعني المفرود اننا بنكتب و انتم كتر الف خيركم بتقروا ، المفرود كده تسيبولنا رد ، لو احنا ماشيين صح شجعونا ، لو مشينا في المخالف وقفونا ، قيمونا سلبا و ايجابا ، بحيث اننا نرتقي بمستوى اللي بنكتبه مش ننحدر بيه ، او على الاقل نلاقي دافع يخليني العب صوابعي على زراير الكيبورد كده و اشخبطلي كام شخبوطة ..
برده كنت عاوز اقول ان اننا زي ما بالومكم ، باعتذرلكم في الحقيقة عن حاجات كتير اوي كنت بدأتها و وعدت انها حتبقى سلاسل و اختفت مع الزمان ، بدءا من الذهب الاحمر اللي ريق الدايخ نشف عشان اكملها و انا برده مديها طناش و الراجل ذوق و مستحملني ، لحد القناه 378 و غيرها من الحاجات اللي كنت قلت اني حاعملها و ما عملتهاش - و ده بيأكد موضوع انا هجاص اللي كنت حكيتلكم عنه - و ان شاء الله احاول ارجع للمود تاني و اكتب و اكمل اللي انقطع ، يارب يعييني و يعينكم و تستحملوني ..
اه .. لأ مش ضهري ، انا اقصد نسيت اقولكم ان انتوا واحشيني ،و الكتابة واحشاني ، بس المشكلة ان القاريء زي البنت الحلوة ، لازم تعاكسه باحسن ما عندك ، و في الحقيقة انا خايف اني اكتب ما اقولس احسن ما عندي ...
كفاية كده عشان انا لسه باصلح الكمبيوتر ربنا يهديه ، و بعدين احنا اجازتنا بدأت لأول مرة تاريخيا بدري .. حبيت بس اقلكم ان ممكن اي تهييس زيادة يبقى من اعراض عدم التصديق انني مخلص مع اختي اللي في سنة خامسة في نفس الوقت .. يلا حسن الختام سلام .