تنبؤات حمـــــــــــاده

مع اني كنت زعلان منكم و حالف ما اكتبش تاني ع البلوج دي .. غلبتني رحمتي بالناس اللي خلاص لازم يقروا موضوعي قبل ما يناموا .. و بيني و بينكم برضه كان في موضوع مجنني و عايز أكتب فيه .. و لأني حسن .. مش اسمي .. قصدي حسن النية .. ربنا رزقني بحجة أرمي بيها جتتي عليكم و أتلزق ف البلوج و أقول اني بأكتب الموضوع ده للناس عموما مش لأاهل طب اللي ما بيردوش .. بيقروا ينكروا زي القطط
ايه الحكاية بقى يا عم .. و مين حمادة ده اللي بيتنبأ ؟؟ ما تستعجلوش .. كله بأوانه .. من كام يوم كده كنت بره و دخلت على بعض الأقارب مجتمعين بيتكلموا .. وبعدين سمعتهم بيقولوا .. يا حلاوة يا حلاوة .. سألتهم ايه اللي يا حلاوة .. جا الرد بسيط و جميل .. حيشيلوا الدعم عن الغاز و الأنبوبة حتبقى ب 30 جنيه .. عارفين حرف الهاء ده أما بيطلع بقهرة ككده زي اهات أم كلثوم ..المهم أنا فوتت الموضوع و قلتلهم الرد اللي باحب أقوله كتير أوي .. المصريين خلاص .. قربوا ياكلوا صوابع رجليهم
و لكن تأتي رياح الأخبار بما لاتشتهي سفنكم اللي بتقوللي طول النهار و الليل اخرس و ارحمنا من مواضيعك الطويله اللي مش بنعرف نقراها ولا نفهم منها حاجة .. حاضحك .. يقوم واحد منكم زي فرقع لوز يقوللي .. طب ادي الدليل .. اديك كتبت عشروميت كلمة .. و لسه لا فهمنا مين حماده ولا مين تنبؤاته .. برضه على قلبكوا .. مش لسه قايلك من شويه .. كله بأوانه
المهم ايه الرياح بقى .. ان قعدت أفكر و أحلحل الأمور و أعقدها و أحلحله و أعقدها لحد ما عرفت ايه اللي خلى الحكومة حتشيل الدعم ..ايوه الموضوع يتلخص في حاجتين : تجربة شلل الأطفال و بصراحة نسيت الحاجة التانية
اهه كده كل اللي مش بيحبني يأس و فضل معايا حبايبي .. فنكمل بقى .. فاكرين من سنة ولا اتنين طلعوا محمد منير في التلفزيون و قاعد يغني كده و وولد صغير عنده شلل الأطفال مش قادر يلعب مع صحابه و بعديها بكام يوم قالك ان مصر قضت تماما على شلل الأطفال ..و انها أول دوله افريقية تحقق كده و الناس تهلل و تنبسط ..تمام .. و لأن دايما النجاح بيدفع الانسان الطموح انه يحقق نجاح أكبر الدولة عندنا قررت انها تكون أول دوله عالميا تقضي ع البدانه .. عالميا مش أفريكيا زي المرة اللي فاتت ولا مؤاخذة يعني .. سبق عالمي
الرز .. غلوه .. و المكرونه .. بقت تحطها تلاقيها كلها ضاعت في الغسيل .. و الزيت .. الازازة بقت من أحلام المواطن البسيط .. يعني تدريجيا بدأت الدوله تخف النشويات و الدهون من أكلنا .. و بخطوات سريعة تم تنفيذ الأسباب و لكن .. النتايج مش زي المتوقع .. طب نعمل ايه .. الناس مش حتطبخ .. لازم يبطلوا يتخنوا .. لازم يخسوا .. يعني نصادر البوتاجازات .. لأ شكلها مش حيبقى حلو .. و ان كان فيها قرشين بس المنظر العام .. اه .. نصادر الأنابيب .. نخليها قليلة .. طبعا فاكرين أزمة الأنابيب لدرجة انها بقت بطلة أفلام وأغاني .. أنابيب ..بيب بيب.. بس للأسف في مشروع اسمه غاز طبيعي .. و الشركة لسه بتوصل للناس و الأنابيب مش مأثرة .. مش حنخلي كمان الغاز يقطع زي الكهربا و النور .. اشطه عليك .. مين اللي قال الفكرة دي .. حياخد أنبوبة هديه كل شهر .. نشيل الدعم عن الغاز كله أنابيب و فرط .. وخلي حد يطبخ بقى .. فورا كانت دراسات الجدوى ع الترابيزة .. الطبقة الغنيه ما فيهاش مشكله لأنهم بيعملوا ريجيم و بيدفعوا فلوس علشان يبقو شيك و يلبسوا ع الموضه .. الطبقة المتوسطة و قضينا عليها من زمان .. يفضل الطبقة الفقيرة .. المواطن محدود الدخل .. اللي هو مرتبه 100 -350 جنيه .. أيوه دول أغلب أهل مصر بس احنا اللي مش شايفينهم ولا حاسين بيهم .. و اهو لما يختلس وياخد رشوة .. يعني يوصل ألف جنيه مثلا.. أو الناس اللي كانوا من الطبقة المتوسطة و مرتباتهم توصل كده من غير حاجة بس مع غلو الأسعار ما عادش فيها متوسطة بقى .. يضيع ربعهم مواصلات .. و ربعهم مصاريف مدارس .. يبقى فاضله 500 جنيه .. ميه و كهربا و تلفونات و سواه يبقى فاضله 350 جنيه تقريبا او 400 .. امم كده ممكن يشتري و ياكل ..بس ده كان زمان احنا زودنا الانبوبة و كده ياخدله 100 جنيه ولا حاجة أنابيب .. طبعا لو مليانه .. بس احنا حنخليها نص ملوة يا باشا .. لا لا لأ .. ده كده لو أكل عيش من الفرن على حاجات مسلوقة .. أعوذ بالله حد جاب سيرة اللحمة ولا السمك ولا حتى الفراخ .. قصدي الخضار .. ينفع يعيش .. يبقى المشكلة في حاجتين .. الخضار و ده طبيعي بدأ يغلى من المرحلة الأولى .. لحد الكوسة ما بقت ب 3 جنيه و كانوا بيقولوا زمان يعايروا الست اللي بتطبخ كوسة .. الكوسه أكلة الموكوسه .. يبقى فاضل العيش .. طيب .. عارفين الرغيف البلدي .. حنسخطه .. ما تعرفش تفرق بينه و بين الفلافلايه .. أه ما دلوقتي ما عادش حد بياكل فافل جاهزة لا يتخرب بيته .. يعني لو عامل قرر انه يفطر فطورة كويسة .. ياكله أربعه ولا حاجة .. اتين جنيه أو اتنين و نص .. المهم .. سخطوه .. و شالوا الدعم .. و لسه الناس تخينه .. طيب ايه العمل .. اه .. ده كل واحد بدل ما ياكله رغيف بقى بياكل اتنين ولا تلاته .. و مش مأثرة ع الماديات قد كده ..طيب .. و الله لنخلي الرغيف بربع جنيه و بكده بدل ما كان الواحد بياكل رغيف ع الفطار و اتنين ع الغدا و واحد ع العشا يبقى المفروض ياكل خمس الكمية .. يعني تقريبا رغيف يوميا .. ربع ع الفطار و نص غدا و ربع فطار .... حف الا اذا ربنا كرمه و لقى غموس.. و الله انتوا عباقرة .. كده فعلا رجيم مثالي .. النهارده بقى .. سمعت اخر خبر .. كل اسرة ليها 3 ارغفة يوميا .. تعالوا بقى نرجع للحسبة الأخيرة .. ان الفرد بياكل رغيف يوميا يبقى كده أي أسرة لازم ما تزيدش عن 3 أفراد .. لكل واحد رغيف يوميا سعره ربع جنيه .. يعني مقصور على مقتدري الطبقة الفقيرة الغفيرة من جماهير الشعب .. مش قلتلك كله بأوانه .. أهو السبب التاني اللي بتدور حوله العمليه غير تجربة شلل الأطفال .. تحديد النسل .. أو زي ما بيقولوا تنظيم الأسرة .. على راي جد جراننا و هو بيكلم مرات البواب .. هو انا كل ما اجي ألاقي عندك زرعه جديده .. و بعدين بص لي و قاللي .. حسني مبارك قاعد العددو النفجار و الستات ولا على بالهم .. ماهو ببلاش .. فينه دلوقتي أقوله ما عادش ببلاش يا عمي الحاج .. صبح صبح .. لأن انت و مراتك كل واحد رغيف .. أول عيل أكله مجانا تقريبا .. فلوس قليلة .. انما اللي جاي .. بفلوس .. يعني في مقارنه مع أهل الصين .. هما العيل التاني بفلوس في التعليم .. و الوظيفة مالوش أولويه على حد علمي .. انما هنا الوضع مختلف .. مش مهم العيال تتعلم هو يعني اللي اتعلموا فلحوا .. ما هم زيهم وي اللي ولا بيفك الخط .. صبيان قهوجية و الواصل و الموهوب صبي رقاصة !.. يبقى مش يخلوا التعليم بفلوس .. لأ .. مش يهرونا دروس خصوصيه و مصاريف بتتضاعف 100% كل سنه .. برضه كل ده طبيعي .. لكن الناس الغلابة دي تبعا للتاريخ اللي بيقول ان الفقر مصاحب للجهل .. مش هاممها علام .. يبقى ما فيش أكل .. حتجيب عيل .. واحد حياكل .. تزود .. حياكلك انت و أمه من الجوع .. لأنك ما فيش عندك جنيهات .. تجيبله فينو ولا كايزر .. و الأسمر حبيب الشعب .. قصدي الرغيف البلدي مش حسن الأسمر .. ما عادش لك فيه نصيب .. و بكده .. من خلال الأنبوبة و الرغيف .. ضربت الحكومة 3 عصافير بحجر و يمكن اربعه .. الاتنين الأولانيين قولناهم .. التالت انها وفرت جزء مهول من فلوس كانت بتروح للدعم .. و الرابع انها أثبتت ان الشعب المصري عنده عبقرية غير محدودة .. طب بالذمة .. ما عجبتكش لعبه الرغيف و تنظيم الاسرة و الرجيم .. ده طبعا غير اننا حنعمل للناس قلق .. و نجيبلهم قولون و سكر و ضغط و يخسوا غصبا عن اللي جابوهم .. بصوا بقى .. حنشيل الدعم علشان دي فلوس مهدرة .. و في نفس الوقت حنشتري مسلسلات ب 30 مليون جنيه .. حنقول حرية الصحافو بعدين نجلدهم .. و بكده العصفور الخامس .. اللي المفروض تكونوا استنتجتوه .. ان الناس لما تجيلها كل الامراض دي بالاضافة لفيروس سي عشان تطعيمات المدارس اللي العشرة بسرنجة .. و البلهارسيا نتيجة مياه النيل اللي اتغير المثل اللي عنه و بقى يتقال اللي يشرب م النيل لازم يجيله فشل كلوي .. كل ده مش حيقدروا يعالجوه .. و بكده نزيد من سرعة معدل الوفيات المتسارع بسبب الجوع .. و الحوادث اللي وراها محرك انساني بحت و هو سد الجوع ..و طبعا أغلب الضحايا حيكونوا من الطبقة الغلبانه .. أحسن .. دي ناس حقوده و ما أعرفش ليه دايما عينهم في الحاجة
و بعدين معاك .. مين حماده بقى و ايه تنبؤاته دي ..
التنبؤات كالاتي
1- في خلال أشهر معدوده باذن الله سيتحول الشعب المصري من خلال تجربة فريده عالميا الى شعب بلا بدانه .. و بكده خلاص .. حتقعد في المشروع براحتك و مافيش حد تخين حيزحمك .. ده بالعكس ممكن يبقى المشروع 21 راكب و بكده يبقى العصفور السادس و هو حل أزمة المواصلات .. في نفس الوقت تحقيق مبدأ تكافؤ الفرص .. لأن كل الشعب حيبقى مقاس واحد .. يعني كل الشباب يظبط و ما عادش في ده مليان وده رياضي و هكذا
2-نصيحة لأطباء امراض التغذية يغيروا النشاط لأن أمراض التغذية نوعين بدانه و دي احنا خلاص حليناها و النحافة اللي استحاله تتحل لأن ما فيش أكل أصلا .. و في الحالتين مافيش حد حيبقى معاه فلوس الكشف .. لو كان معاه كان جاب دوا البلهارسيا لابنه اللي غلط و استحمى بالميه اللي من الحنفية .. ما هو ياما حذره وقالله ما تستحماش يابني
3-سيادة مصر لدول العالم من حيث الدول المصدرة لكل أنواع المنتجات الغذائية و الخام .. و تصدرها لسوق الجثث في العالم و ذلك في محاوله للحد من تصدرها لسوق استيراد التوابيت و لوازم الدفن .. مع بدء سياسة تشجيع أكل لحوم البشر لتوفير البروتين باسعار زهيدة من مكونات مصرية مضمونه 100% و هي اللي ماتوا .. استفيدوا من العلم .. عملية اعادة التدوير هي الصيحة العالمية دلوقتيو على رأي سيمبا في الأسد الملك المدبلج للعربية .. هي دي دورة الحياه
4- تهنئة لكل شركات الأدويه اللي بتعرف تنصب انهم ينزلوا برشام من غير ماده فعالة .. يحطوا فيه حتى سوبيا و يبيعوه على انه بيسد الشهية .. بس رخيص و الناس حتشتري
5-دعوه لكل المشعوذين ان كل كواطن يجيلهم يطلب منهم عمل يصلح حاله و يرزقه اللقمة حلالا كانت ام حراما لنه يوسع النشاط و أنا ممكن أتولى الحمله الدعائية مقابل 30 % من الأرباح
6- فكرة لكل رجال الأعما بشراء الانابيب من السوق دلوقتي و اعادة طرحا باسعار أقل بعد غلوها و المكسب بالنص و بلاش تزوغوا زي التعالب
7-تفاقم مشكلة السحابة السوداء نتيجة عوده المصريين الى استخدام الحطب الذي ارتفعت أسعاره ليصبح معدل نمو سهم شركة حطبكو العالمية المصرية أسرع الأسهم ارتفاعا .. و شركات التدخين تقاضي الحكومة لتوفيرها "الدخان" مجانا للمواطنين ضمن باقة الهواء المدفوع السعر مقدما
8- اتفاق مع الحكومة ان دي اخر مرة أعترض فيها على حاجو .. و على فكرة يا باشا أنا معاكم لأن انا عايز اخس و مش عارف أمسك نفسي
9- رجاء لوما اتقبلش اتفاقي و حصلي حاجة ما تنسونيش م العيش والحلاوة .. و ما تقولوليش العيش غلى و تندلوا .. عارفكم طول عمركم كده

بقلم/ حمــــاده