القناه 387

-أعزائي المشاهدين .. الرفيع منكم و التخين .. معاكم الستاذ محمود حسين من القناة تلتمايه و سبعة و تمانيين ..

-كويس افتكرتها علطول المرادي

- آه .. تصدق انا قاعد احفظ فيها ما امبارح للنهارده

-طب كويس .. كتر التكرار يعلم الشطار

- تحب بقى تعرف راي الناس في حلقة امبارح؟؟

- ياريت

- أول ايميل من اسكندرية ماجد أسامة بيقول مملة و بس ..

- ما أنا عارف

- ياسلام ياخويا ، بتقرا الكف سعادتك؟؟

- بص .. الحاجة اللي انت ما بتتبسطش منها و انت بتحكي عمرها ما حتبسط اللي بيسمع أو بيشوف

- الله عليك .. حكمة بمليون جنيه

- طب ايدك عليهم بقى

- ههه .. طيب احنا كنا وصلنا لمرحلة الطفولة امبارح .. وكنت وعدتني انك تحكيلي عن مقابلاتك مع كابتن ماجد

- الظاهر انك بتحب كابتن ماجد أوي

- آه .. ياما كسرت في البيت عشان اجيب شوطة واحدة من شوطاته .. و عمري ما قدرت ( يطرق في حزن)

- طيب ما تزعلشي .. أنا عنيّا ليك .. نتكلم عن العروسة الراجل

(يمتعض وجهه و يكشر) : - يمشي كلامك .. ده انت الضيف

- ما تزعلش يا استاذ محمود .. أصل أنا بصراحة نفسي اشكي لحد موضوع العروسة ده

- اتفضل يا سيدي

- بص .. و أنا صغير كنت حاسس بالظلم و التفرقة .. كانت أختي الكبيرة عندها عروسة باربي ، و كانت تقعد تلعب بيها ، و تعملها هدوم كتيرة حلوة .. و أنا كنت أقعد اشوف كل ده و ازعل أوي .. لحد يوم ما قررت اسألها هما ليه البنات بس اللي عندهم عرايس و الولاد لأ ؟؟ .. طبعا جاوبتني و هي بتهز العروسة و كأنها بتغيظني: - عشان دي عروسة بنت ، ما ينفعش ولد يلعب بيها .. و كملت لعب عادي و أنا واقف بأبص على العروسة بزعل و بحقد .. و بعدين سألتها : - طب وليه ما يعملوش عروسة راجل؟؟

- سؤال وجيه

- و عمري ما لقيتله اجابة يا محمود ، و كان بيزعلني أوي كل ما اشوف العروسة و لبسها و كانت أختي تقعد تعملها بيت و صالون و دولاب ، و حاجات كتير حلوة اوي .. آه والله يا محمود ، ده أنا حتى ساعات كنت بأساعدها و من جوايا نفسي يبقى عندي عروسة اعملها كل ده .. عروسة بتاعتي أنا

و مرة من المرات لما كبرت و في فترة مراهقتي لقيتها

- ايه؟؟

- العروسة الراجل ، بجد لقيتها .. و قعدت ابص عليها و قربت و مسكت العلبة عشان أتاكد .. بجد .. كنت مذهول ، حلم عمري قدامي .. العروسة الراجل أهو قدامي ..

- طيب الحمد لله ، أهي اتحلت

- لأ .. ما اتحلتش .. يومها روحت و قعدت متردد أني أفاتح اهلي في الموضوع و بعدين قررت أتشجع و رحت كلمت والدتي :

-ماما .. أنا عايز اقولك على حاجة

- ايه ؟؟

- لأ خلاص

- تراجعت ( ينطق محمود بدهشة)

- لأ طبعا .. بس أحسن طريقة انك تكلم ست في حاجة أنك تثير جواها حب الفضول

و طبعا مامتي فضلت تسألني لحد ما قلتلها : -أنا عاوز عروسة !

ما أعرفش ليه الست اتصعقت كده و بصيتلي .. و بعدين اتكلمت : مش بدري ع الحاجات دي ، مش لما تكبر و تتخرج و تشتغل تبقى تفكر في الجواز

جواز ايه بس!! يا نهار ملون شفشتشي .. ده أنااتفهمت غلط خالص.. غلط أوي .. أنا لازم اصلح غلطتتي .. يووه أصلح الموقف بسرعة ..

- ماما .. دي عروسة لعبة

- لعبة!

- آه عروسة لعبة راجل .. أنا .. و حكيتلها الموضوع من أوله

- ووافقت؟؟

- بص هو ما كانش سهل اني أدخل راجل غريب البيت و خصوصا أني عندي أخوات بنات .. بس أما قلت لماما انهم بيوزعوا معاه شهادة حسن سيرة و سلوك ، و بعد مشاورات و مباحثات وافقت ..و أخدت الفلوس و رحت أجيب العروسة .. ولقيتها ..

-طب الحمد لله

- لأ .. لقيتها خلصت .. ( تفر الدموع من عيني ، ثم لا أتمالك نفسي وأنفجر في النويح)

-معلش يا سكوبل .. كل شيء قسمة و نصيب .. مش كده ، هدي نفسك

-خلصت يا محمود ، و عمري ما حيبقى عندي عروسة .. عمري

-استهدى بالله كده و اشرب العصير ..

(يناولني محمود الكبايه .. فالتقطه و ايديا بتترعش و بعدين ما اقدرش و انفجر مرة تانية ): واااااااااااااااااااااااااااااااء

-معلش يا حبيبي .. اهدا ( يطبطب على ظهري) .. اشرب يا حبيبي .. اشرب يا بابا

اشرب الكباية كلها مرة واحدة و بعدين ابصله كده و اقول له :- ايه .. كله مانجا ، مفيش موز؟؟!

(تتبع)