مش أنا للريس رحت
و شكتله همومي و بحت
قلتله علي الوضع الزفت
لا فتيتله و لا ألفت
قلتله علي نومة الخيش
و الجبس اللي اسمه العيش
و سألته اللحمة دي إيه ?
أنا عمري ما دقتها ليه ؟
قلتله الولاد مقاطيع
في اليوم أجيال بتضيع
شايفين ساكتيمن م الخوف
و صراخهم جوه الجوف
العجز مغطي الناس
بالخيبة و بالإفلاس
و حكومة تقول بُقين
يبقوا كرماد في العين
الكاكي يا ريس طاح
لا سيادة و لا إصلاح
و وريتله آثار الضرب
دا ما كانشي جوه الحرب
دي زيارة ف نص الليل
و ريتني بعيني الويل
بس أنا طيب غلبان
بنسي، مهما اتهان
طمعان يشملني العطف
و الخير منك و اللطف
بعد أما رضيت معاليك
تسمعني و انظر ليك
أنا كل مرادي أعيش
من غير ذل و تلطيش
تسمح يا كبير القلب ؟
قالي امشي يا ابن .....
مهندس عمر سامح هلال - القاهرة
omar_s_helal@hotmail.com
الدعاية كما لم تكن من قبل
هناك تعليق واحد:
امممم
حاجة تنفع شتيمة
وعلى وزن كلمة القلب ؟؟
ياترى ايه
:)
احييك يا استاذ عمر على الزجل الجميل
إرسال تعليق