جهاز ضغط و سماعة - الحلقة الثامنه

بعد اذن الدائخ صاحب العلامة التجارية .. كنت عايز بس أقول للناس ان الكلية عندنا بتعمل تطوير شامل ، في كل حاجة .. أي نعم ، فجأة أدركوا انهم لم يقيموا أنفسهم منذ انشاء الكلية على يد الطبيب المغفور له ربنا يسامحه ايا كان اسمه بقى .. و فجأة زي ما تقولوا صحيوا من النوم و لقوا نفسهم تخلفوا عن طب العالم ، بصراحة الجدعان ما قصروش .. عملوا الكلية تيرمات و دي ليها عيوبها و مميزاتها بالنسبة للطالب و ليهم ، لغوا الشفوي عن الكام سنة الاولى .. كل ده مش مهم .. المهم انهم قرروا يعملولنا امتحانات نص-تيرم زي بتاعة هندسة - معلش يا جماعة مش حاكتب انجليزي علشان أنا مش رايق اني أقعد اقلب كل شوية - و بعيدا عن انهم لسه كل يوم يغيروا مواعيد الامتحانت و توزيع الدرجات و ما شابه من الأمور- ما تقولش بيقسموا ورث و الطلبة معترضين ع القسمة - المهم اني كنت سعيد الحظ و عملولنا كوز - مش كويز .. كويز دي كبيرة عليه - صغير كده .. و طبعا بما ان بعض المصادر المسئولة صرحت ان الامتحان ما عليهوش درجات و انما هو حاجة كده عشان يتابعوا مستوانا و عشان الروتين عايز كده - على فكرة يا جماعة مصدر الروتين هو الكلية عندنا .. أصل احنا عندنا معمل اسمه معمل الروتين .. ده بيدخلوا فيه اي حاجة طبيعية تطلع مكتوب عليها " فخر الصناعة المصرية" - و ابتدا الكوز و الطلبة على أعصابهم و كل واحد بيدعي اللهم لا تشمت بنا العدا .. و فجأة نبص على حين غرة كده نلاقي انهم حيعرضوا لاسئلة بالبروجيكتور - تكنولوجيا بقى .. احنا مش قلنا انهم صحيوا أخيرا - طبعا مش مشكله ان البروجيكتور كان بيطلع الصورة مايلة و ان الكلام صغير جدا بحيث اضطرت الدكتورة انها تقرا الاسئلة و احنا نحل بسرعه - قال يعني عباقرة-، طبعا أنا ما كنتش مذاكر - على خلاف ناس كتير اللي ما كانوش ذاكروا برضك علشان ما عليهوش درجات - فاعتمدت على الاسلوب العلمي في الحل المنطقي باتباع القاعدتين الذهبيتين وهما قاعدة حادي بادي و قاعدة انيو اجابة شكلها أظرف .. و الدكتورة تقرا و احنا نألف و نكتب أي هبل .. و المهزلة الحقيقية ان في ناس كسلت تقول حادي بادي و كانوا بينقلوا مني رغم انهم عارفين اني مش مذاكر و بالف .. و عدى الوقت و أنا حالل كل الاسئلة .. المصيبة السودا ان الدكتورة راحت بعدها حلت الامتحان .. و طبعا كل الورق اتغير و اتعدل للحل النموذجي مش على مستواي الشخصي و لكن على المستوى السكشني ، بس صاحبكم برضه خبيث ساب سؤال ما عملهوش سبكا للعملية التطبيخية - و ليست التعليمية - وهكذا مر الامتحان بسلام - سلام على العملية التعليمية طبعا- و لا أمرضكم الله فزرتم دكتورا
أما الموقف التاني فكان العملية الانتخابية .. أصلهم فجأة قرروا يعملوا انتخابات رئيس اللجنة الرياضية في اتحاد الطلبة و الجبهة اللي حتفوز حتمسك الاتحاد الطلابي كله - أو ده اللي أنا فهمته - و دخل عينا اتنين شبان في المحاضرات يحمسونا و يقولولنا صوتك حيفرق و المركبة بتغرق و ارمي الشلم و امسك العلم .. المهم أنا ما حطيتش في دماغي و كبرت ، و في يوم الانتخابات كنت باكلم واحد صاحبي و قالي انه راح انتخب فلان - و فلان ده أنا أعرفه شخصيا - عشان يكسب .. المهم شاورت عقلي و لقيت نفسي فاضي نص ساعة و قلت أصوت .. ما أصوتش ليه هو أنا صغير ولا صغير .. و لا صغير أنا؟؟ ابدا ده انت سيد الرجالة - أنا بارد على نفسي- و بصراحة كان نفسي مرة أحس اني مواطن وليا حق الانتخاب الحر المباشر .. و رحت أنتخب .. و عشان هو انتخاب حر الناس قالتلي أكتب اسم صاحبنا وواحد تاني و ما اكتبش اسم التالت اللي في فريق العدو .. و اتلميت أنا و شوية ناس صحابي و رحنا .. و لأنه برضه انتخاب حر و انا داخل الباب واحد يعرف واحد من صحابي اللي راحوا معايا وقفنا و قالنا حتنتخبوا مين .. رد عليه صاحبي و قاله فلان و علان .. ابتسم و ظهرت أسنانه المغسولة بمعجون أسنان بيدون و قاله : أصل احنا ما خدناش غير 20 في الميه من الاصوات بس - ما اصل الانتخابات الحرة بجد بيبان فيها نسبة المصوتين قبل ما تتفرز .. مش باقولكم انتخبابت حرة حرة يعني - سابنا ندخل .. طبعا أنا حمدت ربنا اني ما رديتش واني استنيت صاحبي يرد عشان هو اللي عارف كلمة سر الليل و لولاه ما كنتش مارست حقي الطبيعي في الانتخاب الحر .. و دخلت جوه لقيت لجنة زي اللي بيجيبوها في التلفزيون ايام النتخابات الحقيقية .. شاورلي بصباعه اتنين ولا تلاته .. رديت بالاشارة برضه تلاته - ما أنا خلاص اتعلمت كلمات السر- و راح هو مطلع كشوف سنة تالتة و علم على اسمي و اداني ورقة بعد ما شاف بطاقتي .. قلتله طب و فين الحبر الفسفوري ؟؟ راح اللي جنبه مطلع ورقة كربون و ماسك ابهامي و مسحه فيها - ما انا لازم أحس بالشعور الكامل للانتخابات الحرة و من ضمنها الحبر السفوري ، مع ان واحد نعرفه في انتخابات الرئاسة دخل مرة بصم باليمين و كتب لا و التانية قال للراجل ده صبعي ملون مكان البنجر و بصم بالشمال و قال نعم و صلح غلطتته - و رحت رايح ناحية صندوق خشبي - اه .. انا زيكم برضه اتصدمت انه مش صندوق زجاجي - و كتبت الاسمين و طبقت الورقة و ضحكت لكاميرا القناة 378 و رحت مدير عيني لقيت واحد صاحبي كان داخل معاي خد الورقة بتاعته من غير ما الراجل يدعكله صبعه بالكربونة قلتله روح للراجل قوله عايز الحبر الفسفوري .. وفعلا صاحبي راح قام الراجل بص ليا باعجاب - مش باهتم ان النتخابات الحرة تتم في صورة كامله خاليه من التزوير - و مسحله ايده بالكربونة و اديت صاحبي القلم و قلتله ع الاسماء اللي هو المفروض يكتبها .. و انا ماشي اتنين من صحابنا كانوا دخلوا و مش عارفين يكتبوا مين مع صاحبنا لاولاني رحت شاورتلهم ع الاسماء و قلتلهم فلان وفلان .. رقم 3 و بعديه 1 - ما هي انتخابات حرة يا جماعة- و مشيت سعيد جدا لأني أصبحت مواطن كامل المواطنة له الحق في الانتخاب الحر .. و طبعا حيطلع واحد من القراء عليه عفريت عزول عايز يحرجني و يقوللي و انت انتخبته عشان هو صاحبك ؟؟ دي تبقى انتخابات هبل ، لكن أنا بقى عليا بقية عيلة العفاريت اللي غاوية احراج حارد عليه واقوله لأ .. أنا فعلا طلبت من المرشح برنامجه الانتخابي و عرفت ان هو حينظم ماتش ريال مدريد و برشلونه في ملعب الكريكيت ، و كمان حيجيبوا كريستيانو رونالدو في ندوة رياضيه في التصوير الطبي ... و لأنه كان أقوى من برنامج المرشح التناي و لأنها انتخابات حرة ، أنا رحت و انتخبته ..
ملحوظة بالوظة مفعوظة : الانتخابات اتلغت و حتتعاد النهارده ، و طبعا أنا رايح رايح ، ده انتخاب حر يا جماعة