طوابير

بعد كل هذه الأزمات من الطوابير في مصر، لدرجة إن في ناس ماتت و هي واقفة في طابور شهادات الملاد، فالورثة وقفوا بدالهم ف طابور شهادات الميلاد و طابور شهادات الوفاة، كل ده علشان يضيفوا المواليد الجداد عل بطاقة التموين .. بعد كل ده، شاف إنه من المناسب إني أقول:

طوابير هنا و هناك طوابير
و منين ما تمشي تلاقي طوابير
و طابور صغر و طابور كبير
و طابور طوييييييييل
و طابور سرمدي عمره ما خلص
و يوم ما يخلص
ينعمل بداله عشر طوابير

و طوابيرنا غير كل الطوابير
ده طابور بشرطة للباشا و الوزير
ده لو وقفوا أصلاً ف أي طابور
و ده طابور بكرباج و جزمة لسواقالحمير
و دول م الوقفة عيشتهم بقت ماخور
و ده طابور براحته
تبدتيه الصبح
و تنهيه هلكان ع السرير
دا غير إن طوابيرنا، و لا مؤاخذة
ماشية بالنعر
و أظن كلامي مش محتاج لتفسير

و غلطان اللي قال إن السمن و السكر و الزيت
و العيش و المواصلات و دفع فواتير البيت
و أي حاجة تانية ف بالك هي بس اللي بطوابير
ده حتي العيشة بقت بالطوابير
فلان مستني دوره ف الجواز
اكمن الفلوس رايحة لأخته علشان الجهاز
و الجهاز سعره غال ملوع بجاز
و علاّن، مش عارف يفتح له دكان
بقي له زمان
و م القعدة ضرب شقلباظ
أصل دوره لسه ماجاش
ف قرض بنك الإسكان و التعمير

بلاش لا كده و لا كده
مش أنت طالب حالاتي
يعني قدامي أربع سنين بالميت
و تطلع تقول يا هادي
تكتشف إنك لو كنت استغلت حاتي
كان زمانك بتلعب بالدولارات و الدنانير
أصلك حتطلع توحوح و تهاتي
و تشوف أيامًا هباباتِ
و تلاقي قدامك ع الوظيفة طوابير

ده أنت حتي ا أخي لو اتلابطت ف يوم
و طبقت ليلتين ورا بعض من غير نوم
و دبتها عركة و لا إليوم
حتستني دورك ف الحجز و التكاشير

ده إحنا يا خلق من زحمتنا و فقريتنا
حتي دخول القرافة بقي بالطوابير !
و زمان قالوا أما صحيح بلد شهادات
لكني م اليوم و حتي الممات
بقول أما صحيح .. بلد طوابير