علشان مدونتك تنجح!!

شغلتنى الأيام الأخيرة فكرة هو لية الناس بتخش تقرا وما بتعلقش..... حتقوللى هومين قاللك ان فيه ناس بتقرا ليكم أساسا؟ حقوللك دة اللى بيقولوا العداد برة........ واللى خلانى أفكر فى الموضوع أكتر أنى لقيت حبيبة هو كمان متضايق من الموضوع....... فكّرت وفكّرت....... قلت يمكن الكلام دة بيحصل فى المدونات كلها ...... قلت لا الكلام دة ما لهوش أى موقع من الاعراب..... دة فيه مدونين مصريين وصل عدد الزوار والمعلقين لاكتر من نصف مليون زائر ومعلق شهريا.... يعنى اكتر من توزيع أى جرنان.............قلت يمكن عشان احنا كتابتنا فيها شىء من الهيافة....... قلت لا برضه ..... دة أحلى حاجة بالنسبة للشعب هى الهيافة..... دة حتى فيه مثل بيقول ادّينى فى الفاضى وأنا أحبّك يا فننّس...... وان كنا لا نكتب تهييس خالص ...... دايما كلنا بلا استثناء بنكتب تهييس هادف....... ولو شاكك فى كلامى راجع كل التدوينات لكل المهيسين حتلاقى وراها معنى........ قلت يمكن يابو صيام عشان كلنا طلبة فى طب والناس قالت أكيد دول طلبة نفيخة حيطلّعوا عقدهم علينا .......... ردّيت وقلت ماهو فية ست طالبات فى من صيدلة -ولاد عمامنا- عاملين مدونة وماشية ميت فل وعشرة.........قلت طب ما تيجى ندرس الموضوع بأسلوب علمى شوية ..... حتقوللى ازّاى؟...... حقوللك ادّينى عقلك وامشى حافى...... تعالى نشوف المدونات الناجحة نجحت ازّاى....... وقعدت وفكرت وخططت وطلعتلكم بالنتائج المتواضعة دية ويا رب تستفيدوا

علشان مدونتك تنجح وتكسر الدنيا لازم :

يأما تكون معارض للنظام بصورة فجّة وتقعد تشتم وتولول وتنشر كليبات التعذيب ودى مش سكتنا

يا اما تقعد تشتم فى الدين فى التقاليد وتقعد تشكك فى ثوابتنا .... أو تتكلم فى الأباحة وقلة الادب ودى برضه مش بتاعتنا

اللى انا حقوله دلوقتى دة اللى انت ممكن تعمله ..... وهو أنك تتكلم شوية عن حاجة مزعّلة الناس ...... عن مشكلة عامة الناس حاسة بيها أوى وتعالجها بقلمك الساخر الجميل حتلاقى مفعول السحر....... ولنا فى هذا شاهد...... غادة صا حبة مدونة عايزة أتجوز..... لو دخلت على مدونتها - اللى اتحولت فيما بعد لكتاب- حتلاقى ان مستوى كتابتها عادى جدا مفهوش افتكاسات..... بس حتلاقيها حاسّة باللى هية بتقولوا أوى ...... هى بتناقش مشكلة البحث عن عريس ...... مشكلة بتأرق بنات كتير أوى...... وبتعلجها بأسلوب ساخر جاد .... بس بسم الله ماشاء الله المدونة مكسرة الدنيا... لدرجة انها اتعملت كتاب -عقبالنا يا رب-وأنا هنا ما بعارضش اننا نكتب عن الطب والكلية لأن بجد كليتنا _ وخاصة كليتنا- محتاجة مواويل وقصايد...... بس أنا باتكلم لو عاوز مدونتك تنجح أوى.......تصور مثلا انك دخلت مدونة ولقيت معظم تدويناتها على كلية تجارة واللى بيحصل فيها...... الموضوع مش حيهمّك أوى ..... مع أنى برضه مش مرتاح للموضوع اوى لأن الطب محتاجة ومحتاجة كتابة من هنا للصبح.......محتاجين برضه ان احنا ننشرها ..... يعنى فكرة الورق الصغيّر اللى كان عاملها عبد الرحمن جميلة ...... ولية ما نكررهاش....... ويا ريت نخش بصفة دايمة على المدونات التانية وتسيبلهم تعليقات مع اسم المدونة..... أنا خلصت .... بس برضه الموضوع مليان ..... ممكن نفتحه قريب تانى

تنويه: أنا فى التدوينة دى بانصح نفسى قبل الكل..... يعنى ولا انا عامل فيها المعلم رشدان ولا ماما نظيفة ...... برضه أنا مبسوط أوى من اخر تدوينتين( سنة أولى والوطيان) وأنا حاسس ان دول تطبيق عملى للى انا قلته..... فالشعور المرير بالوطيان أ ثناء الامتحانات مشترك عند الناس كلها....... وأشوفكم بخير