الشجرة قليلة الأدب

اتعودت لما أصحى الصبح ابقى قرفان .. يرتبط ده عندي بالصحيان بدري و الهم الذي أنا مقبل عليه .. الكليه .. بكل اللي بيحصل فيها .. و لكن أول ما بأنزل الشارع بيستقبلني الهوا المنعش بتاع بدري .. أحس أني خدت دش ساقع و صحيت من الدهوله اللي كنت فيها .. في الحقيقة أول ما كان ده بيحصل كنت بأبدأ أنشط عقليا و أبدأ أقرر أني لازم ابقى أحسن .. و أني حأروح النهارده بعد الكلية أذاكر و مش حاضيع وقت في اللعب .. ولا الكتابة في تهييسة .. ده حتى مافيش حد بيرد بكلمة شكر و لا حتى حلو .. جميل .. استمروا و كده .. المهم ان طبعا على ما كنت باروح الكلية وأرجع كانت تبقى ريحة العوادم .. و الهباب اللي بيملى الجو .. خلتني كاره عيشتي .. ممكن حد حيقول و ليه من ساعة ما بتحكي بتتكلم بصيغة الماضي .. أصل السر ورا الهوا المنعش في شارعنا كان كمية الشجيرات و الأشجار الصغيرة المزروعة فيه .. بالاضافة لمجموعة أشجار كبيرة في بعض الفلل المجاورة .. يعني هوا يرد الروح و خضرة .. و حاجة تمام .. فجأة .. لقيت سفاح ماشي في الشارع ماسك منشار و نازل تقطيع في الشجر .. لحد ما معظم الشجر بقى مجرد عيدان بنية اللون .. في خلال أسبوع كان شجر المنطقة المحيطة كله أوراق ملقاة على الأرض .. و جذوع و أفرع عارية من أوراقها .. بدءا بشجيرات الطريق .. أشجار الفلل ..و حتى أشجار التحريات العسكرية .. بيرجح البعض ان الشجر اتقطع لأسباب أمنية و بيستدلوا على كده بقطع شجر التحريات .. و لكن التحريات كل سنه بتخفف أشجارها اللي أغصانها كانت بتمتد للطريق و تظلله ..البعض التاني بيقول .. أن الشجر اتقطع لأن الشباب شباناو شابات كانوا بيفتكروا المنطقة شارع الغرام و يسندوا على العربيات في الشارع تحت الشجر و انتم أدرى مني باللي بيحصل .. خصوصا و ان الوقفات الأخوية .. ما المصريين من يوم ما عرفتهم و كلهم أخوات .. ممكن تستمر الى بعد الحادية عشر مساءا .. في شارع بعد العاشرة يكون شديييييد الهدووووء ..أنا ما قصديش حاجة طبعا
جايز واحد طقت في دماغه يقطع الشجر و قال يستغل التوقيت اللي التحريات العسكرية بتخفف فيه أشجارها .. و يعمل اللي في نفسه و الكل طبعا حيسكت احتراما للاعتبارات الأمنية ..مش مشكله ايه اللي جرى .. اللي حصل ما أعرفهوش و ما حاولتش أعرفه .. لكن اللي عقلي الصغير قدر يعرفه أن الدنيا هبل .. و كل اللي يقدر يعمل حاجة يعملها .. و أن احنا في حين بنحاول نعمل مشروع الأسطح الخضراء ..و بنشتكي من قلة الخضرة في مدن المحروسة .. بنقطع الأشجار الموجودة .. و أن احنا في نفس الوقت اللي بنعمل غابات صناعيه حول المدن .. بنشيل شجر الطريق .. عشان نصلح الرصيف و بعدين نزرع شجر جديد .. ما هو بكرة يكبر ! و كذلك حالنا في كل شيء .. نبني بايد و نهدم بالتانية ..و لا على بالنا تلوث ولا غيره .. عايشين في عالم تاني غير البشر اللي بيزرعوا و بيملوا الدنيا خضرة .. بنستصلح في الصحرا و توشكى .. و في نفس الوقت مدينة الاسكندرية بدل ما تنمو جهة الصحراء بينها و بين القاهرة بتنمو جهة الدلتا .. حصن مصر الزراعي .. ليه مش عارف
المهم اني بقيت أمشي في الشارع كل يوم الصبح أشوف الجذوع الخضراء .. و أتذكر مذبحة شاهدتها و عاصرتها و للأسف لم أحاول ايقافها .. و أكمل في طريقي متضايق قرفان من الدنيا .. و أدندن و أقول
افتكرتها و سالت نفسي
ليه أتقتلتي .. لازم يكون في سبب
سألت رد عليا أبو منشار بيسأل
أنيو .. الشجرة المؤذية ولا قليلة الأدب؟؟